Iyamkitaza uHugo Broos eyokwanda kwethalente kwiBafana
Umqeqeshi weBafana Bafana uHugo Broos ubhekene nenselelo enzima yokuqoka iqembu lakhe ewindini elilandelayo lemidlalo yeFifa.
Lo mqeqeshi odabuka eBelgium ujabule ngokudepha eqenjini lakhe akubone emidlalweni yakamuva.
Kuleli windi uHugo Broos akazange abakhethe abadlali beMamelodi Sundowns njengoba bebelungiselela iFifa Club World Cup ese-United States.
Esikhundleni salokho, wethule ubuso obuningi obusha eqenjini lesizwe futhi wahlabeka umxhwele ngokusebenza kwabo.
IBafana Bafana idlale ngokulingana ngo 0-0 neTanzania ePeter Mokaba Stadium ePolokwane ngoLwesihlanu olwedlule.
Ilandelise ngokunqoba iMozambique ngo 2-0 ngoLwesibili enkundleni efanayo.
UHugo Broos uzame abadlali abahlukene kuyo yomibili le midlalo ngoba efuna ukwandisa isibalo sabadlali beBafana.
Ukudepha eqenjini manje kuyamangaza. Kuhlanganisa nabadlali abadlale kule midlalo neeTanzania neMozambique.
Kukhona nabadlala kwiCosafa Cup ngaphansi kukaVela Khumalo, nabadlali beMamelodi Sundowns abebengekho.
Iqembu lesizwe laseNingizimu Afrika lika-Under 20, elisanda kunqoba iCaf Under 20 Africa Cup of Nations, nalo linabanye abadlali angabheka kubo.
Kukhona nabanye abadlali abadlal kuleli nabaseYurophu ebebengekho kuleli qembu ngenxa yezizathu ezehlukene.
UHugo Broos uyivumile inselelo yokukhetha iqembu lakhe uma sekuzodlalwa imidlalo yokuhlungela iNdebe yoMhlaba ngoSepthemba.
“Manje sesinabadlali abangu-40 esingakhetha kubo,” kusho yena ngemuva komdlalo weMozambique.
Ukholelwa ekutheni lo mbango wezindawo kwiBafana uzophusha abadlali ukuthi baqinise kakhulu.
“Bayazi ukuthi kukhona abanye balinde ukuthatha izindawo zabo. Lokhu kuzokhuphula izinga.”
Njengoba sanda isibalo sabadlali abakhombisa ukulambela nokulungela ukudlala kwiBafana, ikusasa laleli qembu libukeka lilihle.
Lokhu kuzokwenza uHugo Broos aphathwe yikhanda uma sekumele aqokele imidlalo yangoSepthemba.
“Lokhu kuzoba nzima ngoba kumele ngishiye abanye abadlali ngoSepthemba, abadlali mhlawumbe abafanelekile, kodwa ke kulungile.”
