UBobby uthembisa okuhle ngeKaizer Chiefs
IKaizer Chiefs izobuyela emiqhudelwaneni yamakilabhu yeCaf ngesizini ezayo ngemuva kokunqoba iNedbank Cup ka-2025.
Ukunqoba kwayo kuyenze yangena kwiCaf Confederation Cup. IKaizer Chiefs ishaye i-Orlando Pirates ngo 2-1 kowamanqamu.
Lo mdlalo bewubudlalelwa eMoses Mabhida Stadium eThekwini ngoMgqibelo.
UGaston Sirino noYusuf Maart bashayele Amakhosi amagooli. U-Evidence Makgopa ushaye elokubika ekhaya lePirates.
Lokhu kunqoba kunikeze iChiefs isicoco sayo sika-14 seNedbank Cup. Manje sebeyiqembu eliphumelele kakhulu emlandweni walo mqhudelwano.
Imenenja yeqembu kwiKaizer Chiefs, uBobby Motaung ithi sebeqalile ukuhlelela isizini ezayo.
Ukuqinisekisile ukuthi isikwati sizophuculwa. Kulindeleke ukuthi kusayinwe abadlali abasha ngaphambi kokuqala kwesizini ezayo.
“Kube wuhambo olunzima futhi olubafanele abafana, abalandeli, nosihlalo, obekezelele wonke umuntu sonke lesi sikhathi.
“Cishe iminyaka engu-10 yokulinda indebe ukuze nje senze abalandeli bethu baphinde bajabule,” kusho uMotaung.
“Ngibonga leli qembu, nesizukulwane esinaso njengamanje ngoba silwe kanzima.
“Kimina, umoya weqembu nokubambisana ngaphansi kwezimo ezingezinhle.
“Leli yiqembu elinabadlali abasebancane iningi labo. Sisazoliqinisa. Lokho kufanele lokho ngoba siya e-Afrika manje.
“Kodwa okubalulekile wuhambo esiluhambile. Ukulinyalelwa esibe nakho, nengcindezi laba bafana abebengaphansi kwayo.
“Ngicabanga ukuthi kubafanele ukuthola le ndebe nale njabulo,” kwengeza uMotaung.
Amalungiselelo esizini entsha aseqalile. IKaizer Chiefs kulindeleke ukuthi imemezele abadlali abasha abasayinisiwe maduze.
Umgomo wayo ucacile — ifuna impumelelo ekhaya nase-Afrika.
Njengoba kungena kulindeleke ithalente elisha, ikilabhu ihlose ukubuyisela udumo lwayo lwaphambilini.
NoBobby Motaung uthi iChiefs izobe isilungile. Uhambo lokunqoba i-Afrika seluvele luqalile.
