UBasadien uyakujabulela ukuhalelwa yiChiefs
- Intatheli yeLISENETHINI
Umdlali wasemuva weStellenbosch FC, uFawaaz Basadien, usephendule ngentshisekelo ekhonjiswe yiKaizer Chiefs ngokumsayina.
Yize iChiefs yafaka isicelo ngaye, iStellenbosch yasichitha, yakhetha ukugcina lo mdlali odlala kwesokunxele emuva.
UBasadien ungomunye wabenze kahle kwiStellies ngesizini edlule, esiza ekutheni iqede isendaweni yesithathu ingene kwiCaf Confederation Cup.
Ngaphezu kwalokho, iStellenbosch ibe yiqembu lokuqala ukudla iCarling Knockout.
UBasadien uqhubekile nokwenza kahle nakule sizini, kanti usenamagoli amathathu emidlalweni emihlanu.
Ekhuluma esithangamini sabezindaba seBafana Bafana, uBasadien ugcizelele ukuzinikela kwakhe kwiStellenbosch.
“Ngokwami, ngicabanga ukuthi okumele ngikwenze wukulawula engingakwazi ukukulawula,” kusho uBasadien.
“Nginenkontileka neStellenbosch, futhi yilapho engidlala khona.
“Ngakho-ke, engingakwenza nje wukwenza kahle isonto nesonto ngoba ngikhona ukuzokwenza umsebenzi.
“Akufanele ngikhathazeke ngokuthi kwenzekani kwabezindaba.”
Yize uBasadien evuma intshisekelo yeChiefs, uthi yena usagxile eqenjini lakhe lamanje.
“Kuhle ukufiswa yiqembu elinjengeChiefs, kodwa mina ngigxile kwiStellenbosch nasekwenzeni kahle kuyo.”
IStellenbosch isibe nempumelelo yize ilahlekelwe ngabadlali abamqoka abafana no-Iqraam Rayners, uDeano van Rooyen, no-Antonio van Wyk.
UBasadien ibeka le mpumelelo ebudlelwaneni obuqinile beqembu nokusebenzisana.
“Okunye okugqamayo kithina njengeStellenbosch Football Club ukuthi siyasebenzisana,” kuchaza yena.
“Abekho abantu abazidlalela into yabo eqenjini. Wonke umuntu uzinzile, futhi kuwumoya weqembu okufanele sisizane ngaso sonke isikhathi futhi sikhulisane.”
