UBarker uveza okwenza u-Adams adube iBafana
- Sibongiseni GUMBI
Kwathusa abaningi ukuxoshwa komdlali osemncane weStellenbosch FC, uJayden Adams ekhempini yakamuva yeBafana Bafana.
Lo mdlali oneminyaka engu-23 wakhishwa eqenjini leBafana ebelidlala neCongo, kwabikwa ukuthi kungenxa yokuhluleka wukuziphatha.
UHugo Broos, ocija iBafana, akazange akuveze akwenza ukuthi kuthiwe akaziphathanga kahle, kodwa kwavela ukuthi akafikanga ekhempini ngosuku okwakumele afike ngalo.
Umqeqeshi wakhe kwiStellies, uSteve Barker usekuvezile athi usola ukuthi kube nomthelela ekutheni lo mdlali angalubhadi eGqeberha lwa bekukhempe khona iBafana.
“Ngicabanga ukuthi akulungile ukuphawula ngekhempu yeBafana,” kusho uBarker omqalise ebhentshini lo mdlali bebhekene naMaZulu FC ngempelasonto.
“Akungabazeki ukuthi uJayden ungumdlali onethalente elihle. Bekunokukhuluma okuningi ngaye ngasekupheleni kwewindi lokudayiselana abadlali.
“Bekunezinkulumo zokuthi angase aye eqenjini elikhulu, kodwa wafika kwiBafana akangadlaliswa (ngoSepthemba) ngakho bekungesona isikhathi esihle kuye.
“Ungumdlali osezingeni eliphezulu, akudingayo nje wukuthi abuyele esimweni, aqhubeke enze lokho akwenza kahle.”
Ngesikhathi kuvulwe iwindi lokudayiselana ngabadlali, u-Adams wayeke wamataniswa neMamelodi Sundowns.
Lokhu kwagcina kungenzekanga njengoba iStellies ibingasazimisele ukudedela abanye abadlali kwazise beyisidayise kakhulu.
Cishe yikho lokhu okwenze uBarker amqalise ebhentshini, ezama ukumenza aphinde akulangazelele ukubuyela enkundleni.
“Ngicabanga ukuthi ungene wafike wawupholisa kahle umdlalo, wenza sazinza, sakwazi ukuwulawula umdlalo.
“Kwesinye isikhathi kudingeka ube seduze nomdlali, umsize uma ebhekene nesikhathi esinzima.
“Kodwa okubaluleke kakhulu kithi wukuthi siqinisekise ukuthi ubuya ngamandla futhi uyayilwena indawo yakhe kwiBafana.”
