Iqale kabusha ekaBroos ne-Orlando Pirates ngoMbokazi
Umqeqeshi weBafana Bafana uHugo Broos usephinde wayivusa kabusha ingxabano yakhe ne-Orlando Pirates.
Lo somaqhinga waseBelgium usole le kilabhu yaseSoweto ngokutotosa uMbekezeli Mbokazi.
Ubekhala ngento eyenzeke ngaphambhi kwekhempu yeBafana edlule la yayilungiselela khona i-Africa Cup of Nations.
Uthi iPirates yabika imbiba, yabika ibunzi ngokungafiki ngesikhathi kukaMbokazi kunokuthi imthethise ngalesi senzo sakhe.
Uvula lesi silonda nje uBroos iqembu lesizwe lihlangene njengoba lilungiselela imidlalo yokuzwana amandla nePanama.
UMbokazi — manje osedlala kwiChicago Fire e-US — uphinde wafika sekudlule isikhathi ekhempini.
UBroos usebenzise leli thuba ukuphinde aphawule ngangakuthandanga okwenzeka ngaphambi kwe-Afcon.
Ngaleso sikhathi, uHugo Broos uthi i-Orlando Pirates yazama ukuvikela lo mfana osemncane.
UBroos akawuthandanga umlayezo awawuvela kwiBucs uchaza ukuthi kungani lo mdlali oneminyaka engu-21 ubudala ashiywa yindiza okwakumele abuye ngayo.
“UMbokazi wafike sekwedlule ngosuku esikhathini okwakumele afike ngaso,” kusho uBroos ngoMsombuluko.
“Ngathola umyalezo ovela kwiPirates othi uhlala endaweni lapho izinto zokuhamba zingatholakali kalula.”
UBroos uthi lokhu kwakuyizaba nje ngoba le kilabhu ihluleka ukutshela iqiniso lo mdlali osezibona ‘eyisihlabani esiphezulu’.
UBroos ugcizelele ukuthi indlela yakhe ‘yokuqinisa isandla’ uyenza ngoba ubona kuyinto engenziwa emakilabhini aseNingizimu Afrika.
Ukholwa ukuthi ukukhuphuka kukaMbokazi kumenze wazibona esengakwazi ukuzenzela umathanda ‘anqume ukuthi ufika nini ekhempini’.
Ugxeke amaBhakabhaka ngokungamtsheli lo mdlali ukuthi, ‘Ngeke, wenza iphutha manje’.
“Yilokho okudingwa abadlali abasencane,” kwengeza uBroos. “Ungamvikeli uma enza iphutha – mtshele iqiniso.”
UHugo Broos uphinde wagcizelela umuzwa wakhe wokuthi i-Orlando Pirates isheshe kakhulu ukudayisa uMbokazi phesheya.
Naphezu kwalokhu, uMbokazi usephenduke insika ebalulekile kwiChicago Fire kusukela ethuthele kuyo ngoDisemba.
