Isinqumo seKaizer Chiefs ngokusiza iBurundi ngomqeqeshi
IKaizer Chiefs isisithathile futhi yasimemezela isinqumo sayo ngesicelo senhlangano eyengamele ibhola eBurundi.
Le nhlangano beyicele le kilabhu ezinze eNaturena ukuba iyiboleke umqeqeshi wayo uCedric Kaze.
Imfunela ukuba azolekelela iqembu lesizwe njengoba kusekhefini lemidlalo yeFifa nje.
Lo mqeqeshi oneminyaka engu-44 ubudala uzoba ngumqondisi wezokuqeqesha eqenjini lesizwe langakubo eBurundi.
Leli qembu – elaziwa nge-Intamba m’Urugamba (Izinkonjane) – linemidlalo ebalulekile yokuhlungela iCaf Africa Cup of Nations.
Lizobhekana neChad kweyokuhlungela ukungena esigabeni samaqoqo semidlalo yokuhlungela i-Afcon ka-2027.
Ubuchule balo mqeqeshi weKaizer Chiefs bubonwa bubalulekile kule midlalo emibili emqoka:
- Umlenze wokuqala: NgoLwesihlanu, Mashi v Chad (Ekuhambeni)
- Umlenze wesibili: NgoLwesibili, Mashi 31 v Chad (Ekhaya)
UKaze uvele unolwazi lwebhola laseBurundi njengoba eke wasebenza njengephini lomqeqeshi eqenjini lesizwe phambilini.
Ekushiyeni kwakhe kulo ngo-2015, wathuthela eNorth Amerca la ayeyoqhuba khona izifundo zakhe zokuqeqesha.
Ube esejoyina uNasreddine Nabi njengephini emaqenjini ehlukene ngaphambi kokuthi baphelele kwiKaizer Chiefs.
Ekuxoshweni kukaNabi kuleli qembu, uKaze noKhalil Ben Youssef basale banikwa umsebenzi wokuhola iqembu kuze kuphele le sizini.
Udedelwa nje imimoya mihle eNaturela kulandela ukunqoba kweqembu imidlalo emibili kulandelana, lishaya iDurban City neMagesi FC.
Amaphuzu ayisithupha akhuphulele iKaizer Chiefs endaweni yesine kwilogi yeBetway Premiership.
Isinamaphuzu angu-36 ngemuva kwemidlalo engu-20, kanti uKaze kulindeleke abe esebuyile ngaphambi komdlalo olandelayo.
Uzobe esesebhentshini uma iKaizer Chiefs seyibhekene ne-Orbit College emdlalweni olandelayo ngo-Ephreli 16.
Lo mdlalo wangeholidi elaziwa nge-Easter Monday uzoba seNelson Mandela Bay Stadium eGqeberha.
Esitatimendeni, iKaizer Chiefs iveze ukumeseka kwayo uKaze kuloluhambo lwakubo.
“Ikilabhu ifisela umqeqeshi uKaze okuhle njengoba eyokwengeza ubuchule bakhe futhi ekhulisa amava akhe esigabeni samazwe ngamazwe,” kusho iChiefs.
