UMokoena ‘uncimfela’ izibalo, uveza inhloso yeBafana
Njengoba umhlaba wonke ungayiboni kahle i-Bafana Bafana yenza kahle kwiNdebe yoMhlaba, u-Teboho Mokoena uthi yilokho kanye okubenza babe yingozi kakhulu.
Lo makadebona womdlali wasesiswini uveze ukuthi akukho ngcindezi kubo ngaphambi kokubhekana nsokhaya iMexico e-Azteca Stadium ngoLwesine ebusuku.
Izibalo ziveza ukuthi i-Bafana inethuba elingu-7% kuphela lokuphuma eqoqweni noma lokushaqisa iMexico emdlalweni wokuvula.
Kodwa u-Teboho Mokoena uthi lezo zibalo azimkhathazi nakancane.
“Kuthiwa sinethuba elingu-7% lokudlulela esigabeni esilandelayo noma lokuwina lo mdlalo.
“Lokho kusho ukuthi akukho ngcindezi kithi, ingcindezi yonke ikwiMexico,” kusho uMokoena.
“Thina siyazi ukuthi silungiselele kangakanani lo mqhudelwano futhi siyazi ukuthi kulindelekeni kithi.”
Uthe abafuni ukuphila ngaphansi kwefu lomlando ka-2010, kodwa bafuna ukubhala owabo umlando.
“Into engiyikhumbulayo ngo-2010 yigoli likaTshabalala kuphela ngoba ngangisemncane ngaleso sikhathi,” kuqhuba yena.
“Asikaze sikhulume kakhulu ngo-2010. Sifuna ukuzakhela owethu umlando.
“INingizimu Afrika ayikaze ifinyelele esigabeni somkhumulajezi kwiNdebe yoMhlaba futhi yikho esikuhlosile.”
U-Teboho Mokoena uphinde waveza ukuthi abadlali be-Bafana Bafana sebevumelene ngokuthi abafuni ukubuyela ekhaya benokuzisola.
“Ngitshele abafana ukuthi uma sesibuyela ekhaya, akumele sibuyele sinokuzisola. Kumele siwakhiphwe wonke amangwevu.”
