Wenze okungalindelekile uMohafe ngomlayezo kwabeGallants
Umqeqeshi weMarumo Gallants u-Phuti Mohafe wenze okungajwayelekile ngemuva kokwehlulwa kwezakhe ngo 3-1 yiStellenbosch FC.
IGallants ithole isibhaxu okokuqala kule sizini emidlalweni yeBetway Premiership ngoLwesihlanu ebusuku.
UQuwan Plaatjies ube yiqhawe njengoba eshaye amagoli amathathu, wanika iStellenbosch ukunqoba okukhulu edlala okokuqala.
IGallants ibhekane nesikhathi esinzima ngesiwombe sokuqala, yangenelw amagoli amabili alula.
Ngesiwombe sesibili izinto zibe zimbi kakhulu ngesikhathi iStellenbosch yengeza elinye igoli.
IGallants ikwazile ukunciphisa igebe, kodwa yehlulekile ukugcina ibuyile emdlalweni.
UMohafe uthe akayikholwa indlela iGallants edlale ngayo, wabe esekhipha isixoliso esibheke kubaphathi ngaleli hlazo.
“Okokuqala, ngithanda ukuxolisa kwiMarumo Gallants ngenxa yalokhu kuhlulwa okuyihlazo.
“Indlela esihlulwe ngayo bekungafanele yenzeke,” kusho uMohafe ngemuva komdlalo.
Uthe iqembu lenze amaphutha alula avumele iStellenbosch ukuthi ishaye amagoli.
UMohafe uthe uyalivuma iphutha, futhi ulibeka emahlombe akhe ngokuhlulwa kweqembu, wathi bekufanele bavale kangcono emuva.
“Ngiyalivuma iphutha ngalokhu,” kuqhuba lo mqeqeshi osemncane futhi obonakala enekusasa elihle.
“Ngicabanga ukuthi ukube sikwazile ukuvala kahle emuva, singawenzi lamaphutha amabi kanje, ngabe sikhuluma okunye kumanje.”
- FUNDA NALA | OweDowns ukhonjwa kwelaseFrance
U-Phuti Mohafe ubevele emangazile ngokushiya isigubhukane kwiPolokwane City ajoyine iMarumo Gallants ngaphambi kokuqala kwale sizini.
Ubesenesikhathi ekwiPolokwane, futhi wayijika wayenza iqembu elingahlulwa kalula.
- EZISHISAYO| Cofa lapha usithole kuWhatsApp
