UWilliams uveze ‘usizi’ lonozinti eqokwa njengovelele

Unozinti weMamelodi Sundowns u-Ronwen Williams unikele umklomelo wakhe wokuba nguMdlali oVelele kubo bonke onozinti baseNingizimu Afrika.

Ukudlala kahle kukaWilliams kusize iSundowns yanqoba iMilford FC ngo-2-0 ngoLwesithathu ebusuku.

Ukudlala kahle kwakhe kumsize akangangenelwa goli emdlalweni weBetway Premiership.

UWilliams uvimbe kahle futhi wasebenzisana kahle nezitobha zakhe ukuncisha iMilford igoli.

Lo mklomelo ufike ngesikhathi lapho lo nozinti ebhekene nokugxekwa okukhulayo.

Abanye babalandeli bese belibeke ngembaba elokuthi uWilliams usekwenze konke, futhi sekufanele ake aphunyuzwe.

Nokho, u-Ronwen Williams uphendule ngokudlala kahle futhi wabonisa ukuzethemba okukhulu kulo mdlalo wangoLwesithathu eLoftus Stadium.

Ngemuva komdlalo, lo kaputeni weBafana Bafana ukhulume ngengcindezi ebhekene nonozinti.

Uthe ukugxekwa akukhona into ebhekene naye kuphela.

UWilliams uphinde wasebenzisa leli thuba ukukhuthaza abanye onozinti ukuthi baqhubeke nokusebenza kanzima.

“Lo ngumklomelo womnyango wonozinti,” kusho uWilliams kwabakamabonakude.

“KuDenis (Onyango), uRicardo (Goss), uReyaad (Pieterse) futhi ikakhulukazi kumqeqeshi uKennedy Mweene.

“Ngaphezu kokugxekwa esikutholile, siyaqhubeka nje. Futhi akukhona lapha kuphela. Kukuyo yonke iligi.”

Ubalulile nonozinti abayizimbangi zakhe eqenjini lesizwe, ethi uyaziqhenya ngabo futhi ufuna baqhubeke nokuzikhandla.

“Ngifuna uSipho Chaine aqhubeke nokusebenza futhi enze konke okusemandleni.

“NakuBrandon Petersen. Ube nesizini emangalisayo ngesizini edlule, kodwa manje ubhekene nezikhathi ezinzima.

“Kodwa uzobuyela kulelo zinga futhi. Yilokho okwenzeka emsebenzini wonozinti.

“Ngiyaziqhenya ngabo bonke onozinti futhi ngihlale ngibakhuthaza ukuthi baqhubeke.

“Kumele siqhubeke nokuziphusha ngoba umsebenzi wethu uya ngokuya ukhula.

“Sishintshe nendlela onozinti ababukwa ngayo manje.

“Ngijabule nje, futhi lona ngumklomelo wabo bonke onozinti.”

Le nkulumo ka-Ronwen Williams kufanele ukuthi izobakhuthaza onozinti, ikakhulukazi labo ababhekene nengcindezi njengoPetersen weKaizer Chiefs.