UKhanye ne‘qiniso elibabayo’ ngoKaizer Jr kwiChiefs
Owayengumdlali we-Kaizer Chiefs, uJunior Khanye, uthi uKaizer Motaung Jr akakakulungeli ukuhola le kilabhu, wabe esebeka izizathu eziningi ezimenza asho kanjalo.
UKhanye akagodlanga lutho, egxeka indlela iChiefs ephethwe ngayo njengamanje, kanti imibono yakhe ngoKaizer Motaung Jr icacile.
Uthi yena uyamhlonipha uBobby Motaung, owayephethe izintambo eNaturena phambilini.
“Kimina uBobby, engangimazi, wayenza kahle yize noma wonke umuntu enezinto zakhe,” kusho yena.
UKhanye ukhumbula uBobby njengoumphathi owayezibandakanya kakhulu emsebenzini wakhe, elalela abadlali asebemnkantshubomvu futhi ehlala enesikhathi sokulalela izinkinga zabo.
“Ngesikhathi ngilaphaya, wayezibandakanya kakhulu emsebenzini wakhe njengomphathi jikelele,” kuqhuba uKhanye.
“Ungumuntu njengathi futhi unezinto zakhe, kodwa uma ekhuluma nomuntu, wayemlalela ngobuqotho. Uma nginezinkinga, kwakulula ukukhuluma naye.”
Ngokubona kuka-Junior Khanye, umbuzo omkhulu uthi ingabe u-Kaizer Motaung Jr uyakwazi yini ukusebenzisana nabantu abasondelene naye.
“NgokukaJunior, ngadlala naye futhi anginaso isiqiniseko sokuthi ubekulungele ukuphatha iqembu,” kusho yena.
“Kumele ukwazi ukusebenzisana nabantu. Uyakwazi yini yena ukulalela imibono yabanye abantu?”
UKhanye ukholwa ukuthi iChiefs kumele ilandele isibonelo seMamelodi Sundowns ne-Orlando Pirates, athi bayaxoxisana nabalandeli.
“IChiefs kumele ibe njalo. Abalandeli kumele babe nezwi,” kuchaza yena.
“Kungenzeka kungabi yibo abathatha isinqumo sokugcina, kodwa kukhona izeluleko abangazinika abaphathi.
“Ngakho-ke, uma labo bantu bengajabule, kuzoba nezinkinga.”
Isixazululo sikaKhanye sicacile. Uthi iChiefs kumele iqashe umuntu wangaphandle ozonikezwa umsebenzi ocacile nesikhathi esinqunyiwe sokusebenza.
“Angathi, nanku umsebenzi, ngizokunika konke okudingayo futhi sikunika iminyaka emithathu.
“Sizokwahlulela ngendlela osebenza ngayo. Kodwa angicabangi ukuthi uJunior ukulungele ukwenza lokho.”
UKhanye uphinde wangabaza ezinye izinqumo zikaMotaung Junior eqenjini, ethi zishiya imibuzo.
Uveze isinqumo sokuqasha umqeqeshi okhona njengamanje, waphinde wakhuluma ngodaba luka-Andile Jali, athi lwaveza izinto ezazibalulekile ngoJunior.
- FUNDA NALA | Elase-Angola lifuna aphenywe u-Abongile Tom
U-Junior Khanye uthi u-Kaizer Motaung Jr wakhombisa ukuzazisa ngesikhathi uJali etholakala mahhala ngemuva kokudlala phesheya.
“Ngesikhathi u-Andile Jali engenaqembu, wathi yena wayemfuna ngaphambi kokuthi aye phesheya.
“Leyo nkulumo iyodwa nje yangitshela okuthile ngaye,” kusho uKhanye.
“Namanje, esengumphathi wezemidlalo, wenza izinqumo ezingabazisayo.”
Ngesinqumo sokudedela uThabo Cele kodwa kugcinwe uSibongiseni Mthethwa, uKhanye uthe kwagejeka impela ke lapho.
“Angisho ukuthi uCele ubemangalisa kwiChiefs, kodwa ubengcono kunoMthethwa. Awukwazi ke ukudedela uCele kodwa ugcine uMthethwa.
“Kumele azithobe futhi alethe umuntu ozomsiza ekuhlonzeni nasekuphatheni abadlali.”
- EZISHISAYO!| Cofa lapha usithole kuWhatsApp
