U-Ouaddou ufisa uBroos alungise iphutha alenza ngoSipho Chaine
Umqeqeshi we-Orlando Pirates, u-Abdeslam Ouaddou usephumele obala waphonsela uHugo Broos inselelo ngoSipho Chaine.
Uthumele umyalezo ocacile kulo mqeqeshi weBafana Bafana njengoba sekubalwa izinsuku kuqale iNdebe yoMhlaba.
Lezi ziqhwaga zaseSoweto zisemjahweni oshubile wesicoco seBetway Premiership.
Njengamanje zinamaphuzu angu-62 — zisele ngamabili kwiMamelodi Sundowns ezihola phambili.
Yize kuhlale kugxilwe kubadlali baphakathi enkundleni, uChaine ube ngomunye wokukhulunywa ngabo ngemuva komdlalo wangoLwesibili.
USipho Chaine akangenelwanga goli kulo mdlalo abahlule kuwo iStellenbosch, wabe esefaka igama lakhe ezincwadini zomlando zePSL.
Wephule irekhodi ebese linesikhathi eside laqoshwa kwiPSL ebeliphethwe nguRonwen Williams weSundowns.
Ube esephinda eqopha elisha kwiPirates lokungangenelwa goli emidlalweni engu-18 kwisizini eyodwa.
Leli rekhodi beliphethwe uMoeneeb Josephs ongangenelwanga goli emidlalweni engu-17 ngesizini ka-2009/10.
Kodwa yize kunjalo, uChaine washiywa ngaphandle esikwatini seBafana sekhefu elidlule.
Ekhuluma ngemuva komdlalo, u-Ouaddou ukubeke kwacaca ukuthi ukholwa ukuthi ukushiywa kukaSipho Chaine kwaba yiphutha.
“UChaine ungumdlali obalulekile kithina, futhi ngijabule ngaye ukuthi wephule irekhodi leqembu; futhi ukwenze sisenemidlalo esele.
“Ngethemba ukuthi, nakanjani uHugo Broos, umqeqeshi weqembu lesizwe, uzokubona ukusebenza kwakhe,” kusho u-Ouaddou.
“Futhi ngiyethemba ngempela ukuthi uzoba yingxenye yeqembu lesizwe eliya e-USA. Kumfanele lokho, futhi ukusebenzela kanzima.”
