U-Ouaddou ucacisa ngesimo sabadlali abasha kwiPirates
U-Abdeslam Ouaddou useveze ukuthi ujabule ngabadlali bakhe abasha yize engazange abadlalise bebambana neSekhukhune United ngo 0-0.
I-Orlando Pirates imsayinele abadlali abathathu ukuqinisa iqembu lakhe njengoba kubhekwe alwele ukucobishisa zonke izicoco.
Lo mqeqeshi odabuka eMorocco usevele unqobe isicoco seMTN8 neseCarling Knockout kanti usembangweni weseBetway Premiership.
ISITHIYO
Nokho iSekhukhune iphinde yaliphazamisa leli qembu lika-Ouaddou ezinhlelweni zalo kweseligi ngokulincisha amaphuzu agcwele.
Ngemuva kwalo mdlalo la iPirates idlale kahle futhi yakha inqwaba yamathuba, lo mqeqeshi ubuzwe ngabadlali bakhe abasha.
Kubo kukhona uMpho Chabatsane noDaniel Msendami abasuka eqenjini lakhe lakudala iMarumo Gallants no-Andre de Jong obekwiStellenbosch FC.
Kulaba abathathu abasha, nguChabatsane obekhona eqenjini elidlale neSekhukhune ngoMgqibelo ntambama.
ISIKHALA SIKAMBOKAZI
Nokho naso lesi sitobha esisesincane esisayinelwe ukuvala isikhala sikaMbekezeli Mbokazi besisebhentshini futhi asizange sidlale.
“Ngijabule ngendlela abenze ngayo ekhempini. Basesimweni esifanele futhi sebekulungele ukudlala,” kuphendula u-Ouaddou.
“Kodwa kumele balinde ukuthi kufike isikhathi sokuthi umqeqeshi neqembu libadinge – angingabazi ukuthi bazosisiza.
“Ngijabule ngengikubone kubo ekhempini – abakwazi ukukwenza. Kodwa uyazi ngaphambi kokufika lapha, sinezinhloli eziletha abadlali ezibheka ezikufunayo.
“Banakho esikudingayo futhi nginethemba elikhulu lokuthi sizobabona enkundleni maduze nje.”
FUNDA NALA | Owodumo kwiDowns neBucs uzama inhlanhla kwi-Orbit
Abalandeli bePirates bazothemba ukuthi laba badlali bazodlala emdlalweni olandelayo uma iPirates seyibhekene neMagesi emdlalweni weligi.
Lo mdlalo uzoba se-Orlando Stadium kanti kuzobe kubhekwe ukuthi iPirates iwunqobe ukuze iphinde iqhwakele kwilogi.
