Ezinhle nezimbi kwi-Orlando Pirates ngabalimele

I-Orlando Pirates inezindaba ezinhle nezimbi ngokulinyalelwa nokululama kwabadlali abamqoka ngaphambi kokuqala komzuliswano sesibili wesizini.

Omunye wabadlali basesiswini abamqoka baleli qembu kungenzeka ukuthi bangadlali kuze kuphele le sizini ngenxa yokulimala.

Lo mdlali, uSihle Nduli uhlinzwe ngempumelelo ngemuva kokulimala kanzima onyaweni ngasekupheleni konyaka odlule.

“UNduli usalimele futhi mhlawumbe ngeke adlale isizini yonke,” kucashunwe umthombo wekilabhu usho kanje kwiKickOff.

Ukulimala kwakhe kuzoba yisithiyo esibi kuleli qembu alizihola phambili emjahweni wesicoco seBetway Premiership.

UNduli ungomunye wabadlali abaqala yonke imidlalo kusukela ejoyine iPirates esuka kwiStellenbosch FC ekuqaleni kwesizini.

Ezindabeni ezingcono kubalandeli, i-Orlando Pirates yamukele uKamogelo Sebelebele oseluleme ekulimaleni.

USebelebele nomdlali omusha u-Andre de Jong njengamanje bazilolonga neqembu ekhempini yalo eNorth West.

I-Orlando Pirates izobuyela emidlalweni yeligi ngoJanuwari 25 ngokubhekana neSekhukhune United ePolokwane.

AmaBhakabhaka ahlezi eqhulwini ngamaphuzu angu-28 awaqoqe emidlalweni engu-12 kanti ashiya iMamelodi Sundowns ngamaphuzu amabili.

Abadlali bePirates abebehambe neBafana Bafana bona banikezwe isikhathi sokuphumula ngemuva kwe-Afcon.

FUNDA NALA | Inkakha iveza ekufisa ngoRele Mofokeng

Kulabo kukhona uSipho Chaine, Relebohile Mofokeng, uSipho Mbule, Oswin Appollis no-Evidence Makgopa.

ZITHOLE ZISHISA: Cofa lapha usithole kwiWhatsApp Channel yethu