UMohau Nkota nesifiso esikhulu ngeNdebe yoMhlaba
Isihlabani esisesincane seBafana Bafana, uMohau Nkota, sithi sifuna ukuba nguSiphiwe Tshabalala weNdebe yoMhlaba yeFifa ka-2026.
UTshabalala waba nedumela emhlabeni jikelele ngesikhathi seNdebeni yoMhlaba ka-2010 ngokuthi ashaye igoli lokuqala bedlala neMexico ngoJuni 11.
Futhi manje uMohau Nkota – naye ongumgadli weBafana osebenzisa unyawo lwesokunxele – unethuba lokuphinda lowo mlando ngoJuni 11 2026.
IBafana iqhathwe kuGroup A la izobhekana khona neMexico, iKorea Republic, kanye nezwe elizophuma emdlalweni wokuhlunga eqoqweni le-European D.
Njengango-2010, umdlalo wokuvula uzoba phakathi kweBafana neMexico ngoJUni 11 2026 eMexico City Stadium.
Kuzobe sekuphele iminyaka engu-16 lamazwe avula imidlalo yeNdebe yoMhlaba ka-2010 eFNB Stadium.
Ekhuluma ngemuva kokuqhathwa kwemidlalo ngoLwesihlanu ebusuku, uMohau Nkota uthi baqhathwe eqoweni elinzima kodwa eliyajabulisayo.
“Ngeke ngithi siqhathwe namaqembu alula, wonke lawa ngamaqembu amahle kakhulu,” kusho uNkota kwabeSuperSport TV.
“Kithina okumele sikwenze wukuthi sihambe siyozibonakalisa kule midlalo.”
Uthi iBafana kumele akhombise ukuhalela impumelelo nokuzethemba kulo mqhudelwano.
“Sizokwenza kangcono emidlalweni,” kwengeza yena.“Mina ngokwami ngifuna ukuya laphaya ngifike ngishaye amagoli.
“Ngifuna ukuthi kube yimi oshaya igoli lokuqala leNdebe yoMhlaba yeFifa ka-2016.”
FUNDA NALA | Kuphinde esika-2010 kuqhathwa eyeNdebe yoMhlaba
IFifa kulindeleke ikhiphe uhlu oluphelele lwemidlalo yeNdebe yoMhlaba ka-2026 ngoMgqibelo.
ZITHOLE ZISHISA: Cofa lapha usithole kwiWhatsApp Channel yethu
