UCardoso ucacisa ngamazwi akhe ngabalandeli beSundowns
Umqeqeshi weMamelodi Sundowns u-Miguel Cardoso usechaze kabanzi ngamazwi akhe asuse umsindo kubalandeli beqembu kuleli sonto.
UCardoso ugxekiwe ngemuva kokuthi ethe abanye babalandeli abakhuluma kakhulu “abalilandeli okwangempela iqembu”.
La mazwi asuse ukukhuluma okukhulu ngaphambi komdlalo weSundowns neMarumo Gallants.
Nokho, ngemuva kokunqoba iGallants ngo 2-0 eLoftus Stadium ngoLwesithathu, uCardoso uthe amazwi akhe abengaqondile kubalandeli abaya enkundleni beyoseka iqembu.
“Into esiyidingayo wukwesekwa ngabalandeli bethu,” kusho yena ngemuva komdlalo.
“Kuleli sonto ngikhulume ngalokhu futhi mhlawumbe abantu abazange bawuqonde umlayezo.
“Bengikhulumi ngabo bonke abalandeli, bengikhuluma ngalabo abahlale bekulungele ukukhononda.
“Ngoba lolu hlobo lokwesekwa enkundleni luhlala lukhona.
“Futhi asikaze sibajikele abalandeli bethu, abalandeli bayinhliziyo yethu, inhliziyo yeqembu ngabalandeli.
“Kodwa siyakudinga ukwesekwa futhi ikakhulukazi abadlali bayakudinga ukwesekwa.”
Uthe yena njengomqeqeshi akanankinga nokusolwa noma ukugxwekwa, wathi kodwa abadlali bona badinga ukwesekwa qha.
“Umqeqeshi akakudingi ukwesekwa, abadlali bayakudinga futhi ngizohlale ngibavikela abadlali bami.
“Benza konke okusemandleni abo, kwesinye isikhathi badlala kahle, kwesinye isikhathi abadlali kahle…
“Kodwa ngicabanga ukuthi sesiphule irekhodi emlandweni webhola laseNingizimu Afrika.
“Sesidlale imidlalo engu-31 singahlulwa emidlalweni yasekhaya, futhi yilokhu abantu okumele bakukhumbule.
“Selokhu safika kuleli qembu besilokhu siphula amarekhodi ngokulandelana.
“Futhi kubalulekile ukuthi abantu baqhubeke nokweseka ngezikhathi ezimbi lapho abadlali bekudinga.
“Angiboni izikhathi eziningi ezimbi ezenzekayo. Asiqhubeke nokuthobeka, sonke sibambisene.
“Sizoqhubeka sikhombise izinga lethu futhi silwele imiphumela umdlalo nomdlalo, yilokho okumele sikwenze.”
- FUNDA NALA | UCardoso ubhokele abalandeli beDowns
Lokhu kucacisa kuka-Miguel Cardoso kuza ngemuva kokuthi amazwi akhe okuqala evuse umsindo phakathi kwabanye abalandeli beMamelodi Sundowns.
Ukunqoba ngo 2-0 kwiGallants, nokho, kubonakale kwehlisa ingcindezi ebibhekene nalo mqeqeshi.
- EZISHISAYO| Cofa lapha usithole kuWhatsApp
