UMaela ubalula umdlali ambona eqhakaza kwiPSL njengamanje

Obengukaputeni we-Orlando Pirates u-Innocent Maela useqoke umdlali akholelwa ukuthi nguye ovelele njengamanje ebholeni laseMzansi. 

Ekhuluma kwiMike Morton Talks Football, u-Innocent Maela – osanda kuthatha umhlalaphansi – ubalule u-Oswin Appollis njengomdlali osavelelile kule sizini.

“Okwamanje ngingasho ukuthi u-Appollis uyena ongcono kakhulu. Indlela adlala ngayo ingcono kunanoma yimuphi omunye umdlali njengamanje,” kusho uMaela. 

“Ngicabanga ukuthi noSipho Chaine naye wenza kahle kakhulu. Uma ngibheka kwamanye amaqembu enza kahle njengeKaizer Chiefs… lutho.”

U-Appollis, ojoyine amaBhakabhaka ekuqaleni kwale sizini, usayidlale yonke imidlalo yeligi kuleli qembu kuze kube manje.

Usheshe wazibonakalisa njengomunye wabadlali abahle uma kuhlaselwa, kanti uyalekelela noma sekumakwa. 

Ijubane lakhe, ubuhlakani, nokuzimisela okungaguquki sekumlethela ukunconywa ukunconywa ngabalandeli nongoti.

Yize izihlabani ezinjengoRelebohile Mofokeng, Teboho Mokoena, noSipho Mbule nazo zingabanye babenza kahle, u-Innocent Maela ukholwa ukuthi akekho osafike ezingeni lika-Appollis.

UMofokeng, naphezu kwethalente lakhe elingangabazeki, akakabuyeli emgqigqweni wakhe ngaphansi komqeqeshi omusha wePirates u-Abdeslam Ouaddou.

Uphazanyiswe nawukulimala okuphinde kwamlahlekisela indawo yakhe eqenjini likaHugo Broos leBafana Bafana. 

Khonamanjalo, uMokoena usaqhubeka nokuhlaba umxhwele kwiMamelodi Sundowns ekhombisa ukungaguquki emgqigqweni wakhe. 

UMbule yena usephinde wabuyela efomini kusukela ejoyine iPirates — kodwa uMaela ugcizelela ukuthi umthelela ka-Appollis yiwo osahamba phambili.

FUNDA NALA | UZwane uthi wunyaka weDowns kwiChampions League

Ukudlala kuka-Appollis kumenze waba yimbangi eqinile yokuhlonishwa ngomklomelo omkhulu wePSL ekupheleni kwesizini.

Futhi njengoba iPirates isaqhubeka nokuhubha izicoco emiqhudelwaneni ehlukene kule sizini, umthelela ka-Appollis usazobhekwa ngabomvu. 

ZITHOLE ZISHISA: Cofa lapha usithole kwiWhatsApp Channel yethu