Sekuputshuke isithombe sejezi ‘elisha’ leChiefs
Sekuputshuke izithombe ezikhombisa ijezi elisha okuthiwa elizogqokwa yiKaizer Chiefs ngesizini ezayo futhi selamukelwe ngezindlela ezahlukene ezinkundleni zokuxhumana.
IKaizer Chiefs iyikilabhu evamise ukuthi isuse isasasa njalo uma ikhipha ijezi layo elisha, futhi lithengwe ubuthaphuthaphu.
Nakulokhu kubukeka kungeke kuhluke njengoba leli eseliputshukile selibajabulisile abanigi yize kungakaqinisekiswa ukuthi yilo ngampela yini
Isithombe aleli jezi sifakwe yi-Unplayable ku-X ngoMgqibelo ekuseni, futhi abalandeli bazwakalise imizwa eqinile ngalo.
Yize abaningi, ikakhulukazi abalandeli beKaizer Chiefs, belincomile, abanye babona sengathi aliyona into okungaze kubangwe ngayo umsindo.
U-@SiweleFanBase uphendule kanje: “Ngifisa sengathi ngabe nasenkundleni bahle njengaleli jezi labo.”
U-@Ceemaster7 uvumile ukuthi uhlabeke umxhwele – nokho hhayi ngokuzikhethela: “Bengikulungele ukuzobahleka kodwa empeleni libukeka lilihle 😭🤣💔.”
U-@Iam_Fortune627, usebheke ngabomvu elasekuhambeni: “Ngicabanga ukuthi elimhlophe lizoba 🔥🔥🔥🔥🔥 Ngiqaphele ukuthi amaqembu amaningi e-PSL anamajezi amahle asekuhambeni noma awesithathu nalawa wasebenzisa ukujima kunawasekhaya. Leli liwu🔥🔥🔥🔥🔥”.
U-@KitsoDaKit, uqhathanisa nelangesizini edlule angazange alithande kangako: “Lingcono kunaleli eliluhlaza.”
U-@BathabileLethob, uvele waqonda ngqo ephuzwini: “Kuhle kakhulu futhi alibona ubukhazihazi.”
U-@BigFlex30 akazange ahlabeke umxhwele: “Limbi, njengenjwayelo!! Umxhasi wabo uyaqhubeka nokubenzela phansi maan.”
U-@SandeWorldwide naye akazange ahlabeke umxhwele: “Akushwanga nyawo la, sizolithenga nje phela phela ngoba siyalithanda iqembu kodwa iChiefs isivame ukwenza noma yini uma kukhulunywa ngamajezi kula masizini ambalwa edlule.”
U-@Sky_Gee_ ulihlabe walihlikiza: “Ngathi eleqembu laseZimbabwe.”
Ukwethulwa kwaleli jezi – noma elinye uma kungelona leli – kungenye yezinto ezibhekwe ngabomvu njengoba kulungiselelwa isizini entsha.
Ngokusho kwesikhulu seKaizer Chiefs, uJessica Motaung, abalandeli bayoqala ukulibona ngoJulayi 26 ijezi elisha.
Izolisebenzisa emdlalweni wayo weToyota Cup la izogadulisana khona ne-Asante Kotoko eMoses Mabhida Stadium eThekwini.
