UBroos usole ibhola ‘lesidala’ lakuleli iBafana igilwa yiCanada
Umqeqeshi we-Bafana Bafana, u-Hugo Broos, uthi yize iqembu lakhe selikhishwe yiCanada kwiNdebe yoMhlaba, abadlali bakhe kufanele babuyele ekhaya bezigqaja ngoba balwe kwaze kwaba sekugcineni.
IBafana ihlulwe ngo 1-0 yiCanada emdlalweni weRound of 32 ngeSonto ebusuku.
Igoli likaStephen Eustaquio emizuzwini yokugcina yilo eliqeda iphupho leNingizimu Afrika lokudlulela kuRound of 16.
Ekhuluma ngemuva komdlalo, uBroos uvumile ukuthi iCanada ibinamandla, ijubane nokushesha kunabadlali bakhe.
“Basishaye ngesikhathi umdlalo usuzophela. Bekusele imizuzu emibili noma emithathu kuphela, kwabe kuphelile ngathi,” kusho uBroos.
Uthi ibhola lesimanje alisagcini ngokudlala kahle nokuphasana kuphela, kodwa lidinga abadlali abanamandla nejubane.
“Lokhu yinto okumele siyisebenzele ezinyangeni ezizayo. Akukhona ngeBafana kuphela,” kuqhuba u-Hugo Broos.
“Kodwa nebhola laseNingizimu Afrika lilonke kumele ligxile emandleni nasejubaneni.”
Nokho, uBroos uncome abadlali bakhe ngokunikela ngakho konke abanakho enkundleni.
“Abadlali bami badlale ngenhliziyo enkulu futhi banikele ngamaphesenti angu-100.
“Ekupheleni komdlalo ubungabona ukuthi abaningi base bephelelwe amandla.
“Yingakho ngithi, yize siphuma emqhudelwaneni, siphuma sigcwele ukuzigqaja,” kuphetha uBroos.
- FUNDA NALA | Izigwaze ngowayo iBafana iwasha ijezi
Njengoba inkontileka ka-Hugo Broos yokucija i-Bafana Bafana iphela, kuzobhekwa ngabomvu ukuthi iSafa izoyelula yini.
Abalandeli abaneme neze ngendlela ajike ngayo izinto kulo mdlalo njengoba ephinde wabuyela esitayeleni esigxile ekuvaleni emuva kunokuhlasela.
- EZISHISAYO| Cofa lapha usithole kuWhatsApp
