UHlungwani uncoma unompempe ‘ophike igoli’ leZamalek
Owayengunompempe kwiPremier Soccer League uVictor Hlungwani usencome unompempe waseRwanda uSamuel Uykunda.
UVictor Hlungwani uthi u-Uykunda ukhombise isibindi ngesikhathi ephika igoli ebelishaywe y iZamalek emdlalweni wayo weCaf Confederation Cup neKaizer Chiefs.
IZamalek iphume ithwele izandla ekhanda kulo mdlalo obusePeter Mokaba Stadium, isola lo nompempe ngokuyibamba ngophondo.
Ifake isikhalo esisemthethweni kwiCaf ngalesi sigameko nangezinye izinqumo ebenomuzwa wokuthi bezingafanele futhi beziyicindezela.
Igcizelele phakathi kwezinye izinto ukuthi igoli likaSeifeddine Jaziri — eliphikwe ngenxa yokuthi ubedlalise kabi umdlali weChiefs – bekumele libalwe.
Kodwa uVictor Hlunguni – osesebenza njengomhlaziyi wonompempe kwiSABC Sport – uthi unompempe ushaye emhlolweni ngesinqumo sakhe.
Lesi sigameko sibandakanya umdlali wasemuva weChiefs, u-Inacio Miguel, ophushwe nguJaziri waze wayoshayeka phansi ngaphambi kokuthi ashaye leli goli.
UHlungwani uchaze ukuthi lo mgadli usebenzise isandla ukusunduza uMiguel ngemuva, okuyisenzo esiyicala.
“Kukhona ukusunduza uMiguel, kuthi uma uphusha ophikisana naye ngemuva okumenza ukuthi awe, lokho yicala.
“Unompempe ubeseduze futhi ushaye impempe ngoba ebona kupushwana,” kusho uHlungwani kwiSoccerzone.
“Ngakho-ke, kube yisinqumo esifanele lesi esithathwe unompempe ukuthi alichiteh leli goli.”
FUNDA NALA | Elase-US selikuqinisekisile ukusayinwa kukaMbokazi
Esikhalweni seZamalek kwiCaf, iphinde yacela ukuthi kuqale ukusebenza kweVAR esigabeni samaqoqo kulo mqhudelwano ukugwema amaphutha onompempe.
ZITHOLE ZISHISA: Cofa lapha usithole kwiWhatsApp Channel yethu
