U-Elias Mokwana ucathanyelwa amakilabhu aseYurophu
Umdlali wasophondweni weBafana Bafana u-Elias Mokwana angase aqhubekele phesheya kwezilwandle maduze.
Lokhu kulandela ukuvela kokuthi iqembu lakhe laseTunisia i-Espérance livulekele ukudayisa oyedwa phakathi kwakhe nomgadli waseBrazil uRodrigues.
Ngokwe-Unplayable, iqembu laseRussia elidlala kwiPremier League iDynamo Makhachkala nelaseSaudi Pro League i-Al Hazem aseveze izifiso zokusayina u-Elias Mokwana.
Ngaphezu kwalokhi, kukhona namakilabhu asePoland naseBelgium asiqaphe ngeso lokhozi isimo salo mdlali.
U-Elias Mokwana, oneminyaka engu-24 ubudala, ujoyine i-Espérance esuka kwiSekhukhune United ekuqaleni kwesizini edlule.
Ufike eTunisia wadlisa ngejubane nokuzimisela ngomsebenzi wakhe okumenze umdlali omqoka eqenjini.
Yize ebesazijwayeza ibhola laseNyakatho Afrika, ukwazile ukuhlohla amagoli amathathu, wakhela ozakwabo amane emidlalweni engu-18 kuyo yonke imiqhudelwano.
Ngaphambi kokuthi aye eTunisia, uMokwana ube nesizini enhle kwiBetway Premiership, esiza iSekhukhune ukuthi iqede engxenyeni ephezulu kwilogi.
Washaya amagoli amahlanu, wakhela ozakwabo ayisithupha emkhankasweni ka-2023/24, futhi waqokelwa kwiBafana Bafana okokuqala.
Ebholeni lamazwe ngamazwe, u-Elias Mokwana udlale eqenjini leBafana kwi- Afcon ngonyaka odlule futhi waba ngomunye wabadlali abagqamile.
Kusukela lapho usedlale eminye imidlalo embalwa ngaphansi komqeqeshi uHugo Broos.
Ukubamba kwakhe umgqigqo owodwa nokukwazi ukudlala ezimpondweni zombili kumenza abe ngumdlali okhangayo emaqenjini afuna ukudlala ngejubane ezimpondweni.
Njengamanje nokho akukho okusemthethweni osekwethulwe kuyo kodwa i-Espérance kulindeleke ukuthi ilalele iziphakamiso ezizovela emasontweni ezayo.
Ukuthi uzoqhubeka kuleli qembu noma uzoqhubekela phambili lo mdlali sekuzobonakala ngokuhamba kwesikhathi.
