UDansin udalula imfihlo yokugqama kwiPirates
Umdlali wasesiswini se-Orlando Pirates, u-Camran Dansin, usebalule okwenza akwazi ukungena khaxa eqenjini yize esemncane.
Uthi ukholo lwakhe kuNkulunkulu nokwesekwa abakuthola kubaqeqeshi kumsize wagqama ngesikhathi iqembu linqoba ngo 2-0 lishaya iMilford FC ngoMgqibelo.
Lo mdlali osemncane uqokwe njengoMdlali oVelele ngemuva kokudlala ngendlela encomekayo e-Orlando Amstel Arena.
Usize iPirates iqale isizini yeBetway Premiership ngamaphuzu amathathu.
Ngesikhathi eyolanda umklomelo wakhe, ubephelezelwa uzakwabo uSimphiwe Selepe, okuyinto etshengise ubumbano olukhona kubadlali abasebancane bePirates.
“Okokuqala ngibonga uNkulunkulu. Bekungeke kwenzeke ngaphandle Kwakhe,” kusho uDansin.
“IPirates iyabathemba abadlali abasebancane futhi nathi sihlala sesekana. Yingakho nibone uSelepe ehamba nami.
“Ukube bekunguyena obedlala, nami bengizomjabulela ngendlela efanayo.”
Yize i-Orlando Pirates iwunqobile umdlalo, u-Camran Dansin uthe kukhona okusamele bakulungise.
“Kubalulekile ukuthi sidlale njengeqembu futhi sibambisane,” kuqhuba yena.
“Bekuwumdlalo wokuqala wesizini, ngakho bekungekhona ukudlala kwethu okuhle kakhulu. Siyazi ukuthi singenza kangcono.
“Into ebalulekile ukuthi siwakhile amathuba, satholana kahle enkundleni.
“Futhi sigcine siwutholile umphumela ebesiwufuna. Lokho bekubaluleke kakhulu kithina.”
- FUNDA NALA | Okulovise uKaze koweSekhukhune
U-Camran Dansin uphinde wancoma abaqeqeshi be-Orlando Pirates ngokumethemba nokuhlale bemkhuthaza ukuthi asebenze ngokuzikhandla.
“Ukube abaqeqeshi bebengangikholwa, ngabe angizikhandli kangaka,” kusho yena.
“Bahlale bengikhuthaza ukuthi ngiqhubeke nokusebenza kanzima, mina okumele ngikwenze wukwenza umsebenzi wami enkundleni.”
- EZISHISAYO| Cofa lapha usithole kuWhatsApp
