U-Andre de Jong uveza okumhehele kwi-Orlando Pirates
Umdlali omusha we-Orlando Pirates, u-Andre de Jong useveze okumenze avumele phezulu uma leli qembu limeshela ukuba azolijoyina.
U-Andre de Jong ungomunye wabadlali abathathu i-Orlando Pirates eqinise ngabo iqembu njengoba kuvulwe iwindi lokuhwebelana ngabadlali lamaphakathi nesizini.
Uyijoyine esuka kwiStellenbosch FC la abesehlale khona isikhathi eside. Ulandelwe eduze ngoDaniel Msendami noMpho Chabatsane abasuka kwiMarumo Gallants.
“Ngijabule kakhulu ngokujoyina i-Orlando Pirates. Kuhlezi kunzima ukushintsha iqembu ngoJanuwari,” kusho uDe Jong.
“Kodwa ngibheke ngabomvu ukuthola imidlalo bese ngifaka isandla empumelelweni yeqembu.
“Ngesikhathi ngikwiStellenbosch sidlale imidlalo embalwa yamanqamu nePirates la sihlulwe khona.
“Kuthe uma ngizwa ukuthi iPirates iyangifuna, ngajabula kakhulu,” kwengeza lo mdlali oneminyaka engu-29 ubudala odabuka eNew Zealand.
Uthi lo mnyakazo ubaluleke kakhulu ebholeni lakhe njengoba umnika ithuba lokuzihlola eqenjini elikhulu, elilwela izindebe.
“Lesi yisahluko esijabulisayo kakhulu,” kuqhuba yena. “IPirates ikhombise impumelelo engethemba ukuthi nami ngizokwazi ukufaka isandla ukuya phambili.
“Yinto eqhamuke emasontweni ambalwa edlule… Kube nzima njengoba kusekhefini lamaphakathi nesizini, silwela ukubuyela esimweni esifanele.”
Njengoba esefikile kweziMnyama futhi esenikezwe inombolo ebisetshenziswa uMonnapule Saleng, uyazi lukhulu olubhekwe kuye.
“Kuyisifiso sawo wonke umuntu lapha ukunqoba iligi kule sizini. Sinethuba elihle njengoba sihlezi eqhulwini njengamanje.
“Besilokhu sisebenza kanzima kulamasonto amabili edlule ukuqinisekisa ukuthi sisesimweni esifanele.
“Nangaphandle lukhulu olulindelwe abalandeli ukuthi siqede indlala yesikhathi eside yesicoco seligi.
“Nginethemba lokuthi sizokwazi ukukwenza lokho kule sizini. Mina ngifuna ukufaka isandla ngoba ngiyafuna nami ukunqoba iligi.”
FUNDA NALA | IPirates seyengeze ngabanye ababili eqenjini layo
U-Andre de Jong ube esephetha ngokuthi ufuna ukushesheshe ajwayele unyawo lwe-Orlando Pirates ukuze abe nesandla empumelelweni yeqembu.
ZITHOLE ZISHISA: Cofa lapha usithole kwiWhatsApp Channel yethu
