U-Ouaddou uveza okumchaza ngePirates 

Umqeqeshi we-Orlando Pirates, u-Abdeslam Ouaddou, uthi ujatshuliswe yindlela iqembu lakhe eliqhuba ngayo nokuzilungiselela isizini entsha eSpain.

AmaBhakabhaka abuyele eSpain okwesithathu kulandelana ukuyolungiselela isizini entsha yeBetway Premiership neCaf Champions League.

Kuze kube manje, iPirates isidlale imidlalo emibili yobungani. Idlale ngokulingana ngo 1-1 neCordoba CF, yase inqoba iCadiz CF ngo 2-1 ngoMgqibelo.

Abadlali abasha nabakhushulelwe eqenjini elikhulu banikwe ithuba lokuziveza kule midlalo. 

Phakathi kwabo kubalwa uMatome Mmolai, uNeo Rapoo, uMthetheleli Mthiyane, uBohlale Ngwato, uSbangani Zulu noGamphani Lungu.

UChristian Derbyshire, uSimphiwe Masilela noMpho Padime, abakhushulelwe besuka eqenjini leDStv Diski Challenge, nabo bathole ithuba lokudlala.

U-Ouaddou uthe uyazithanda izimpawu azibonile kubadlali bakhe kule midlalo ye-Orlando Pirates.

“Abadlali banginike izimpendulo ezinhle. Isinyathelo ngesinyathelo sikhuphula izinga lomfutho.

“Futhi sesisondele kulelo zinga esizolidinga uma kuqala iligi emasontweni amabili azayo,” kusho yena.

Uthe ujatshuliswa wukuzimisela kweqembu, indlela elivala ngayo emuva nokuthi seliqala ukuhlasela ngokushesha uma selilitholile ibhola.

Nokho, uvumile ukuthi kusekhona okumele kulungiswe ngaphambi kokuthi libe sesimweni asifunayo.

“Angijabulanga ngendlela esiqale ngayo umdlalo neCadiz. Imizuzu yokuqala eyishumi besingagxilile, sagcina sidedela igoli. 

“Lokho kumele sikulungise ngaphambi kokuqala kwesizini,” kusho u-Ouaddou.

• FUNDA NALA | UMdledle usola uNdlovu ngokuya kwiDowns

I-Orlando Pirates isazodlala eminye imidlalo emithathu yobungani la u-Abdeslam Ouaddou ezoba nethuba lokuqhubeka nokuhlola inqubekela phambili.

Izobhekana ne-Al Ittihad ngoLwesibili, i-UD Las Palmas ngoLwesithathu neNeom SC ngoLwesihlanu ngaphambi kokubuyela eNingizimu Afrika.

• EZISHISAYO| Cofa lapha usithole kuWhatsApp