Banekhono elihle, kodwa bantunta nendishi

– Intatheli yeLisenethini

Kudedelwe inqwaba yabadlali kwiDStv Premiership kulokhu njengoba amakilabhu ePSL enciphisa ubukhulu bezikwati zawo ngenxa yesimo semali. 

Bangaphezu kuka-75 abadlali abangenawo amakilabhu njengamanje, kanti yize abanye bengawathola amaqembu amasha ngaphambi kokuthi kuvalwe iwindi, abanye bangase bathwale kanzima ukuthola izinkontileka zesizini ezayo. 

Kubadlali abangenamaqembu njengamanje kukhona abanamagama aziwayo nokubhekwe ngabomvu ukuthi bazophelelaphi.

Naba abadlali abangu-10 aphambili kulabo abangenamaqembu njengamanje kuleli:

• USiyabonga Nhlapo – Umdlali wasemuva obedlala kuChippa United ngesizini edlule, uNhlapo uyakwazi ukusebenza njengomdlali wasemuva kwesokudla namaphakathi. Ulwazi lwakhe lumenza abe ngumdlali obalulekile kunoma yiliphi iqembu elifuna ukuqinisa emuva.
• USifiso Hlanti – Wayengumdlali wasemuva weBafana Bafana uchithe iminyaka emibili edlule neKaizer Chiefs ngaphambi kokuba akhululwe ekupheleni kwenkontileka yakhe. Ubuhlakani bukaHlanti bokuvikela namava ebhola lamazwe ngamazwe kulindeleke ukuthi kuhehe isasasa elikhulu.
• USiyanda Xulu – UXulu ubekwiSuperSport United. Ucele ukukhululwa ngenxa yokungadlaliswa. Engaba wusizo olukhulu ngamava akhe emaqenjini axegayo emuva. 
• USibusiso Mthethwa – Lo mdlali wasemuva omude ubedlala kwiRichards Bay ngesizini edlule. Ubude bukaMthethwa nekhono lakhe lokudla amabhola asemoyeni kungaqinisa noma kuliphi iqembu.
• UKeagan Dolly – Uke waba yithemba leKaizer Chiefs, kodwa ukulimala kumphazamise kakhulu uDolly. Manje njengoba esevulelekile ukujoyina noma yiliphi iqembu mahhala, ufuna isiqalo esisha ukuze avuselele umsebenzi wakhe.
• USiphelele Luthuli – Wake wabonakala engumdlali wasesiswini othembisayo, kodwa uLuthuli uthwale kanzima kwiChippa United ngesizini edlule, wadedelwa ekupheleni kwesizini. 
• UBongani Zungu – Umdlali obeyisethenjwa ngaphansi kukaRulani Mokwena kwiMamelodi Sundowns, uZungu okwamanje akanaqembu ngemuva kokuphela kwenkontileka yakhe. Isipiliyoni sakhe senza kubonakale kungeke kube nzima ukuthola elinye iqembu. 
• UNhlanhla Mgaga – Yize ebenesizini enhle, kumangazile ukukhululwa kukaMgaga kwiStellenbosch FC. Bekulindeleke asheshe alithole elinye iqembu. 
• UKermit Erasmus – Lo mgadli uthwale kanzima ukuthola ijezi kwi-Orlando Pirates, kanti ukuhamba kwakhe bekungeke kugwemeke ngesikhathi kuphela inkontileka yakhe ngoJuni. Ikhono lika-Erasmus lokushaya amagoli lisalokhu lingenakuphikwa.
• UGaston Sirino – Umdlali osenesikhathi eside egijima kwiMamelodi Sundowns, ubudlelwano bukaSirino neqembu buba muncu ngemuva kokuzama ukufuduka ngenkani kumasizini amabili edlule. Ikhono lakhe nolwazi lwakhe kumenza abe ngumdlali ongabonakali ezoliswela isikhathi eside iqembu. 

Njengoba kuqhubeka iwindi lokudayiselana ngabadlali, kuzobhekwa ngeso lokhozi isiphetho salaba badlali. 

OLUNYE UDABA: Bazophinde babe ‘sesibayeni esisodwa’ uMokwena noRamovic? 

Abalandeli kufanele ukuthi bamagange ukubona ukuthi laba badlali abanamava bazobe begijima kumaphi amaqembu ngesizini ezayo.