Sewufikile umzuzu omkhulu ku-Artan ngemuva kokuphoxeka
Unompempe waseSomalia, u-Omar Artan, uzoqopha umlando ngoLwesithathu uma eseshaya impempe emdlalweni we-Uefa Super Cup.
Lo mdlalo uphakathi kompetha be-Uefa Champions League, iParis Saint-Germain, nabaphethe i-Uefa Europa League, i-Aston Villa, eRed Bull Arena eSalzburg, e-Austria.
Lokhu kuqokwa kusho lukhulu ebholeni lase-Afrika njengoba u-Artan ezoba ngunompempe wokuqala ongeyena owase-Europe ukuphatha lo mdlalo omkhulu.
Ukuqokwa kwakhe kuwubufakazi bokukhula kwesithunzi sakhe ebholeni lomhlaba nokubambisana okuphakathi kwe-Uefa neCaf ekuthuthukiseni onompempe.
Kodwa le mpumelelo iza ngemuva kobuhlungu obukhulu emsebenzini ka-Omar Artan wokushaya impempe.
Ezinyangeni ezimbalwa ezedlule ubeqokelwe ukuba ngomunye wonompempe kwiNdebe yoMhlaba ka-2026.
Nokho, iphupho lakhe laphelela ezeni ngesikhathi evinjelwa ukungena e-United States, yize ayene-visa esemthethweni.
Lokho kwamenza waphuthelwa yithuba lokushaya impempe emqhudelwaneni omkhulu kunayo yonke emhlabeni.
Esikhundleni sokudikibala, u-Artan waqhubeka nokusebenza futhi washaya impempe emidlalweni yaseSomalia naseKuwait.
- FUNDA NALA | Usuthu lubuyise uMaduna
Uthi ukwesekwa akuthola kubalandeli bebhola emhlabeni wonke kwamnika amandla okuqhubeka nokulwela amaphupho akhe.
Manje u-Omar Artan usebuye ngamandla, futhi usezoqopha umlando ngokuba unompempe wokuqala wase-Afrika ukuphatha umdlalo we-Uefa Super Cup.
- EZISHISAYO|Â Cofa lapha usithole kuWhatsApp
