Owayengunompempe ucacisa ‘ngamaphenathi’ koweMTN8
Owayengunompempe wePSL, uZolile Mthetho, useveze umbono wakhe ngamaphenathi amabili abe sematheni emdlalweni wamanqamu we-MTN8 ngempelasonto.
Lo mdlalo bewuphakathi kwe-Orlando Pirates neMamelodi Sundowns, wanqotshwa ezaseChloorkop ngo-2-0.
ISundowns ihambe phambili ngegoli likaTeboho Mokoena ngaphambi kokuthi iPirates ithole ithuba elihle lokulinganisa ngemuva kokubekelwa iphenathi ngemuva nje kwehora lokuqala.
UYanela Mbuthuma uwe engaphakathi ebhokisini ngemuva kokushayisana noMokoena.
Lokhu bekubukeka njengokushayisana ngamahlombe kwabadlali okujwayelekile ebholeni, bobabili belandela ibhola ebeliphakanyiswe nguTshepang Moremi.
Nokho unompempe u-Abongile Tom ube eselikhomba elotheni, kodwa uRonwen Williams walivimba ibhola likaGamphani Lungu.
“Ngokomthetho, ukushayisana kwehlombe nehlombe akulona icala.
“UTeboho Mokoena umncike ngehlombe, kanti lo wePirates ubesevele eziwela.
“Kodwa ube esesebenzisa lokho kushayisana kwehlombe kukaMokoena ukuze kube sengathi udlaliswe kabi.
“Ngakho-ke, bekungafanele kubekwe iphenathi,” kusho uMthetho kwiKickOff.
UMthetho ugcizelele ukuthi akukho lapho enkundleni lapho ukududulana ngamahlombe kuba yiphutha khona.
“Ekuhlanganyeleni kwehlombe nehlombe, akukho phutha, kungakhathaleki ukuthi kwenzeke kuphi,” kwengeza yena.
“Ebhokisini, ngaphandle kwebhokisi, maphakathi nenkundla, noma kuphi enkundleni, akukho phutha uma kungukushayisana kwehlombe nehlombe.”
Uphinde wahlaziya iphenathi yesibili enikezwe iSundowns ngesikhathi esengeziwe.
USiyanda Ndlovu uwe ngaphakathi ebhokisini ngesikhathi egibela phezu kukaThapelo Mokobodi.
UMthetho uthi ekuqaleni naye ubecabanga ukuthi kukhona iphutha, kodwa ukubuka sekuphindwa isigameko kwenze washintsha umbono wakhe.
“Ekuqaleni ngibone sengathi kukhona iphutha, kodwa ngemuva kokubuka sekubuyekezwa izikhathi ezimbili noma ezintathu, ngabona ukuthi alikho iphutha.”
Uchaze ukuthi uNdlovu ubengemuva kukaMokobodi ngesikhathi umdlali wePirates ewa.
“Umdlali weSundowns ubengemuva komdlali wePirates, kwasekuwa umdlali wePirates.
“Ngemuva kokuba ewile, uNdlovu ubebonakala sengathi ubanjwe ngomlenze ngumdlali wePirates obesewile.
“Kodwa izibuykezo zikhombise okunye. Uma ubuka izibuyekezo, akukho okunjalo,” kuchaza yena.
UMthetho ugcine ngokuthi womabili amaphenathi bekungafanele anikezwe.
- FUNDA NALA | Okubhekwe uDa Cruz kwiChiefs
Uthi lezi zigameko zikhombisa ukuthi sekuyisikhathi sokuthi iNingizimu Afrika icabangisise ngokusebenzisa iVAR.
“Kuzo zombili lezi zigameko zamaphenathi, bekungekho phutha,” kwengeza yena.
“Ngicabanga ukuthi sekuyisikhathi sokuthi nathi sisebenzise iVAR, ngoba womabili la maphenathi ngabe ahoxisiwe yiVAR.”
- EZISHISAYO| Cofa lapha usithole kuWhatsApp
