UMoloisane uveza okwenze kube lula ukujwayela kwiChiefs
Umdlali wasemuva we-Kaizer Chiefs, u-Thabo Moloisane, uthi akuzange kube nzima kuye ukuzijwayeza ukudlalela Amakhosi.
Uthi lokhu kungenxa yokuthi uvele ekhule leli qembu lakhe liseduze nenhliziyo yakhe njengoba ekhulele eSoweto, bude buduze nasekomkhulu leChiefs eNaturena.
UMoloisane uzobhekana okokuqala neqembu lakhe lakudala, iStellenbosch FC okuyilo azakhelekulo igama ngaphambi kokujoyina Amakhosi.
Lokhu kuzokwenzeka uma iChiefs isibhekene neStellies emdlalweni weBetway Premiership eFNB Stadium ngoLwesibili ebusuku.
Ekhuluma nabezindaba ngoMsombuluko, u-Thabo Moloisane, oneminyaka engu-27 uthe uthando lwakhe nge-Kaizer Chiefs lwakheka esemncane.
“Ngicabanga ukuthi into yokuqala, ubheka nxazonke ubone ukuthi le kilabhu inkulu kangakanani,” kusho yena.
“Kodwa kimina, okwakha uthando kimi ukuthi ngakhulela lapha. Iqembu ebengilazi ngikhula bekuyiKaizer Chiefs.”
UMoloisane uthi umdlali kufanele aqale ngokuthanda iqembu ngaphambi kokucabanga ngezinye izinto.
“Kubalulekile ukuthi ungagcini nje ngokusayina inkontileka nakho konke lokho,” kuqhuba yena.
“Kodwa kumele uqale uthande ikilabhu, ngoba uma uyithanda ikilabhu, uzokwenza konke okusemandleni akho ngaso sonke isikhathi.”
Lo mdlali wasemuva uyazi futhi ukuthi kungasho ukuthini ukuletha impumelelo eqenjini akhule elithanda.
“Ngiyazi ukuthi yini okuzodingeka ngiyenze ukuze ngikwazi ukuthi ngelinye ilanga ngizincome ngithi, ngakhulela la eduze kodwa ekugcineni ngabuyisela udumo eqenjini.”
U-Thabo Moloisane usedlale imidlalo emihlanu yeBetway Premiership kwi-Kaizer Chiefs kule sizini futhi usebheke ngabomvu ukubhekana neStellenbosch, iqembu abedlala kulo phambilini.
- FUNDA NALA | ULorch ukhonjwa eNaturena
KuMoloisane, lo mdlalo awuwona nje umdlalo ojwayelekile nekilabhu yakhe yakudala — unencazelo ekhethekile.
- EZISHISAYO| Cofa lapha usithole kuWhatsApp
