Sekuqinisekisiwe, uDeano Van Rooyen useyiBhakabhaka

• Intatheli yeLISENETHINI

I-Orlando Pirates isimemezele ukuthi seyisayine umdlali wasemuva kwesokudla uDeano van Rooyen obekwiStellenbosch FC. 

Lo mdlali oneminyaka engu-27 usayine inkontileka yeminyaka emithathu kwiPirates, ehambisana nombandela wokwelula ngeminye iminyaka emibili.

UVan Rooyen ojoyine iStellenbosch FC esemncane, udlale okokuqala ngo-2016, eseneminyaka engu-19. 

Waba nesandla ngesikhathi iStellies ikhuphukela kwiPremiership eminyakeni emithathu ukusuka lapho.

Ukhulile eqenjini, wagcina engumdlali ovelele njengoba egcine esengukaputeni.

U-Die Hond, okuyigama aziwa ngalo ebholeni uVan Rooyen, uyimele ngamalengiso iStellies, edlala imidlalo engaphezu kuka-150 kuyo yonke imiqhudelwano.

OLUNYE UDABA: OwePolokwane ucacisa eyocingo aluthole umdlalo uqhubeka

Olunye ulwazi ngoDeano Van Rooyen

• Isiteketiso: Die Hond
• Inombolo ayothandayo: 7
• Umdlali amthandayo: Cristiano Ronaldo
• Iqembu alithandayo: Manchester United
• Ukudlala okokuqala esigabeni esikhokhelayo: 2016 vs Mthatha Bucks (kwiNational First Division).