Pyramids v Pirates: Iphutha elilodwa elinganquma umphumela
Kulindeleke impi enkulu phakathi kwePyramids FC ne-Orlando Pirates ngoLwesihlanu ebusuku eCairo.
Umnqobi walempi uzozibekisela indawo emdlalweni wamanqamu weCaf Champions League.
Ngemuva kokudlala ngokulingana ngo 0-0 emlenzeni wokuqala e-FNB Stadium, lo mdlalo usavulekile.
Lokhu kwenza kube nelaka nokulangazelela njengoba kuyiwa emlenzeni wesibili eCairo International Stadium.
Womabili la maqembu manje azodinga ukusebenza kanzima ukuze kuphume inkunzi kuwo ezodlulela kowamanqamu.
Iqembu lase-Egypt lizobe libheke ukuqhubeka nomgqigqo nefomu yalo enhle yasekhaya.
IPyramids iyinqobe yomine imidlalo yayo yasekhaya kwiChampions League kule sizini, futhi yahlohla namagoli angu-17, yangenelwa amathathu kuphela.
Iphinde ibe nerekhodi elimangalisayo lemidlalo engu-22 ingahlulwa uma isekhaya kuyo yonke imiqhudelwano.
Leli rekhodi libonakala libalulekile njengoba lingayifaka umfutho kulo mdlalo onengcindezi ephezulu.
Nokho kuzomele ithole indlela yokugqobhoza udonga lwasemuva lwe-Orlando Pirates oluqinile olungakaze luvuzise goli esigabeni somkhumulajezi.
Leli qembu laseNingizimu Afrika lenza kahle ngendlela engalindelekile ekuhambeni.
Linqobe kathathu labe selidlala ngokulingana kanye emidlalweni emine yasekuhambeni kuze kube manje.
IPirates izofika eCairo igcwele ukuzethemba ukuthi ingaphinde ishiphe kudliwa, kusale kukhalwa.
Phela kuze kube manje iyona yodwa iPirates iqembu elingayazi nhlobo induku selokhu kuqale lo mqhudelwano walo nyaka.
Izobe ibheke ukuqopha umlando ngokuthi ize ifike kowamanqamu ingazange ihlulwe.
Nokho kuzomele izibambe ziqine njengoba kubuya umgadli ophambili wePyramids u-Ibrahim Adel.
U-Adel unamagoli amahlanu kwiChampions League kule sizini, kanti nguye ozobe ebhekiwe ukugqobhoza udonga lwePirates olungathi nsi.
AmaBhakabhaka wona azoncika kwithalente likaRelebohile Mofokeng lokuvula izikhala nejubane likaMohau Nkota.
Bobabili laba bafanyana abasebancane sebeshaye amagoli amathathu ngamunye kulo mqhudelwano wanonyaka.
Njengoba womabili lamaqembu ehlulekile ukubhakuzisa inethi emdlalweni odlule, umphumela ungase uvele ngeputha elilodwa, noma ubuhlakazi bomdlali okhethekile.
Kodwa into eyodwa esobala wukuthi — isiphetho sale ndumezulu yomdlalo sizovela eCairo.
