OweKaizer Chiefs ukhala ngamacebo ‘amabi’ ePirates kwidabhi
Usale ekhala ngakubize ngamacebo amabi asetshenziswe yi-Orlando Pirates umqeqeshi weKaizer Chiefs uCedric Kaze.
Lokhu ukuveze ekhuluma ngemuva komdlalo weSoweto dabhi la ezakhe zibhaxabulwe khona ngo 3-0 eFNB Stadium ngoMgqibelo ntambama.
IPirates iwulawule zisuka umdlalo, futhi yashaya igoli lokuqala kusaphele imizuzu emihlanu umdlalo uqalile.
AMAGOLI EPIRATES
UTshepang Moremi udedele udalimede weshodi engaphandle kwebhokisi, ibhola lazishayisa kuFlavio Silva qede layoqabula inethi.
U-Oswin Appollis ube ese shaya elesibili elenze kwayiwa ekhefini iPirates isihamba phambili ngo 2-0.
Lokhu kwenze kwacaca ukuthi kuzosinda kwiKaizer Chiefs futhi kuzodingeka isebenze kanzima ukuze ibuye kulo mdlalo.
“Bekubafanele ukuwina. Besingekho ezingeni labo,” kusho uKaze ngemuva komdlalo.
“Sisheshe sangenelwa yigoli engicabanga ukuthi yikho okuphazamise ebesifuna ukukwenza emdlalweni.”
UBUQILI BEPIRATES
Lo mqeqeshi weKaizer Chiefs ube esekhala ngobuqili bePirates athi isebenzise amacebo angemahle okumosha isikhathi.
“Esiwombeni sesibili bese singcono kodwa imbangi beyisebenzisa amacebo amabi njengoba bebeziwisa njalo, bemosha isikhathi.
“Lokho kwehlise umfutho wethu. Igoli lesithathu lingene sisele nabadlali abangaphelele njengoba u-Inacio Miguel ebelimele esaphumile.
“Asikwazanga ukumaka kahle, ngicabanga ukuthi lokho kuphoxile. Kodwa sisenemidlalo engu-13 esasisalele.
“Lo mphumela uyababa impela kodwa kuzomele siwugwinye ukuze siqhubekele phambili.”
FUNDA NALA | UChislett uphawula ngesiqalo sakhe kwiChiefs
Lo mphumela ubuyisele iPirates eqhulwini kwilogi yeBetway Premiership njengoba seyinamaphuzu angu-41 ngemuva kwemidlalo engu-18.
