OweTS Galaxy usole inkundla iMagesi idedela induku
U-Adnan Beganovic, umqeqeshi we-TS Galaxy usale esola amaphutha nobubi benkundla ngesikhathi iqembu lakhe lihluleka ukunqoba okwesithathu kulandelana.
I-TS Galaxy ihlulwe ngo 2-1 yiMagesi FC emdlalweni weBetway Premiership eSeshego Stadium ngeSonto ntambama.
Lo mphumela unciphise amathuba aleli qembu laseMpumalanga okuqeda endaweni yesithathu kwilogi.
UBeganovic akazange ahlabeke umxhwele ngohlobo lwebhola elidlaliwe kulo mdlalo, wathi bekuwumdlalo onzima.
“Bekuwumdlalo onzima, sizamile konke ukuzilungiselela lo mdlalo,” kusho uBeganovic ngemuva komdlalo.
“Kodwa inkundla ayizange isivumele ukuthi sidlale ibhola esilijwayele, nembangi nayo ayizange asivumele ukuthi sidlale ibhola ngendlela esiyijwayele.
“Abadlali bebewa ngaso sonke isikhathi, futhi ngicabanga ukuthi le nkundla ayilifanele neze ibhola elikhokhelayo.
“Engikubonile namuhla yibhola ebelindiza emoyeni ngaso sonke isikhathi, futhi ngiphatheke kabi ngalokho.”
UBeganovic uphinde wavuma ukuthi amaphutha abo abalahlekisele ngalo mdlalo njengoba bevumele iMagesi ukuthi ishaye amagoli abebengawavimba.
“Kodwa ekugcineni uma sivele sivumele amaphutha esiwenzile ngeke silindele okunye ngaphandle kokulahlekelwa umdlalo.”
Umqeqeshi weMagesi, u-Owen Da Gama uvumile ukuthi iqembu lakhe alidlali ibhola elikhangayo, kodwa selidlalela ukunqoba kuphela.
Njengoba sekusele imidlalo emithathu, i-TS Galaxy ihlezi endaweni yesihlanu ngamaphuzu angu-36 ngemuva kwemidlalo engu-26.
Isele ngamaphuzu amane kwiSekhukhune United esendaweni yesithathu futhi kuzofanele iyinqobe yonke imidlalo esele uma izofinyelela endaweni yesithathu.
IMagesi yona iziqhelisile endaweni yezembe ngalokhu kunqoba njengoba seyisendaweni ka-11 kwilogi.
Isiqhele ngamaphuzu ayisithupha kwiSuperSport United esendaweni yokuyodlala imidlalo yokuhlunga.
