OweSundowns uveza akucelwe abalandeli ngoCardoso
Njengoba kubungazwa impumelelo yeMamelodi Sundowns, kunombuzo olokhu ulenga – zithini ngekusasa likaMIguel Cardoso.
Lo mqeqeshi uke waba yinukani kubalandeli ezinyangni ezimbalwa ezidlule, bekusho ngeqholo ukuthi kumele ahambe.
Isimo sishube kakhulu ngesikathi kuvela ukuthi ikilabhu ifuna ukubuyisa uPitso Mosimane azoqeqesha iqembu.
Lokhu kwenza abalandeli be-Mamelodi Sundowns abangamfuna okokugcina u-Miguel Cardoso, bekusho bengasabi ukuthi bafuna uPitso bona.
Kodwa manje kubukeka sengathi sebejike ukucabanga, ikakhulukazi uma kuwukuthi abakutshele usihlalo uThlopie Motsepe yilokho abakufunayo ngampela.
UMotsepe uveze ukuthi uke waxoxa nabalandeli abebehlangabeze iqembu esikhumulweni sezindiza ngoMsombuluko.
‘Kuyahlekisa ukuthi umbuzo wangaphambilini bewuthi ‘ingabe umqeqeshi ucabanga ukuthi abalandeli beSundowns sebeyamthanda?’.
“Ngifike kusasele imizuzu engu-40 ngaphambi kokuthi kufike iqembu…
“Ngibe nesikhathi nabalandeli,” kusho uMotsepe kuleli sonto.
“Ngaphandle kokubuza ukuthi iqembu lifika nini, sibabona nini ompetha bethu, noma singayibona yini indebe?
“Cishe bonke babuze ukuthi, ‘Uphi umqeqeshi?’ Futhi abanye babo baze bangiyalela ukuthi ‘umqeqeshi kumele ahlale’.”
Njengoba u-Miguel Cardoso esesifezile isifiso esikhulu se-Mamelodi Sundowns, uMotsepe uvumile ukuthi izingxoxo ngekusasa lakhe zizoqala endaweni enhle kakhulu kunakuqala.
