Okwenza uZwane abe neThemba ngeChampions League kulokhu
Isihlabani seMamelodi Sundowns, uThemba “Mshishi” Zwane, sesikhiphe isixwayiso ngaphambi komdlalo wabo wabo weCaf Champions League neSt Eloi Lupopo.
Leli qembu laseDR Congo limangaze abaningi ngesikhathi lilahlela ngaphandle enye yezintandokazi zalo mqhudelwano i-Orlando Pirates.
UThemba Zwane uthi iSundowns isiphelelwe wumusa kulo mqhudelwano – nayo seyizolwa njengamanye amaqembu.
Ngemuva kokuyishweba kancane le ndebe kule minyaka emibili edlule, uMshishi ukholwa ukuthi lona ngunyaka wabo wokuthi banqobe le ndebe enkulukazi e-Afrika.
“Ngesizini edlule sisondele kakhulu kuyo (bahlulwe kowamanqamu),” kusho uZwane.
“Kule sizini kufanele sikhuphule izinga lethu, umqondo wethu ube sezingeni elifanele — futhi sisebenze kanzima.
“Ithalente lilodwa alisebenzi kwiChampions League. Kufanele ufake nokuzimisela nokuzikhandla.”
ISundowns, engompetha bango-2016, iseqoqweni elinzima la beqhathwe khona neMC Alger kaRulani Mokwena, i-Al Hilal yaseSudan, neLupopo yezimanga.
Kodwa uThemba Zwane ugcizelela ukuthi iSundowns isikulungele ukulwa neLupopo eyaziwa ngokusebenzisa amaqhinga angcolile.
“Siyibukile iLupopo ibhekene nePirates — iyiqembu elingcolile!” kusho uZwane ehleka.
“Bayaluqinisa unyawo, kodwa futhi basebenza kanzima. Sizobafunda kahle futhi sithole ukuthi singababamba kuphi le bebancane khona.”
Njengoba ukuzethemba kuphezulu, nethalente likhona kwiSundowns, uZwane ukholwa ukuthi sekuyisikhathi sokuthi bayiphinde le ndebe.
FUNDA NALA | UBroos uveza okumkhathaza ngokwenziwa u-Ouaddou kwiPirates
“Kule sizini,” kuqhuba yena, “sifuna ukuyiqedela indaba yethu kwiChampions League.”
ISundowns izosingatha iLupopo ngoNovemba 21 eLoftus Stadium emdlalweni ozobe ubhekwe ngabomvu.
ZITHOLE ZISHISA: Cofa lapha usithole kwiWhatsApp Channel yethu
