Okwenza u-Ouaddou angawuvali ngoTshego Mabasa
Umqeqeshi we-Orlando Pirates, u-Abdeslam Ouaddou, usencome uTshegofatso Mabasa ngemuva kokuthi lo mgadli ovutha engabaselwe engene emabhukwini omlando kule kilabhu.
UTshegofatso Mabasa ungene esuka ebhentshini washaya igoli lesibili lePirates ngesikhathi benqoba ngo 2-0 beshaya iTS Galaxy.
Leli goli bekungelika-50 likaMabasa kumaBhakabhaka, okumenze waba ngumdlali wesibili emlandweni wekilabhu ukudlula emagolini angu-50.
Usesele ngamagoli ayisishiyagalombili kuphela ngemuva kwengqalabutho yeqembu uBenedict Vilakazi onerekhodi lamagoli angu-58.
U-Ouaddou uthi amandla amakhulu kaTshego Mabasa akulona ikhona lakhe lokubhakisa inethi kuphela — kodwa yinhliziyo yakhe.
“Uyincweti yempela, uziqeqesha kanzima, futhi uhlale ephakamisa ozakwabo,” kusho u-Ouaddou.
“Ngolunye usuku ngangifuna ukumfaka, kodwa wangitshela ukuthi ucela ngifake uMasindi Nemtajela esikhundleni sakhe. Lokho kukukhombisa uhlobo lomuntu ayilo.”
WINA | Ithuba lokuwina neVicks neLisenethini
Lo mgadli nguye okhuthaze u-Evidence Makgopa ukuthi athathe iphenathi ngoLwesibili, ekhombisa ukuzidela kwakhe.
“UMabasa unenhliziyo ehlanzekile. Lowo moya umenza akhetheke,” kwengeza u-Ouaddou.
Ukunqoba kwePirates kuyenze yafinyelela endaweni yesithathu kwilogi yeBetway Premiership ngamaphuzu angu-15 emidlalweni eyisikhombisa.
FUNDA NALA | Kuphele amazwi oweGalaxy esebukiswa iphenathi abeyiphika
Njengamanje seyidlale imidlalo engu-10 ingahlulwa kuyo yonke imiqhudelwano.
Futhi indaba kaTshego Mabasa isaqhubeka. Ngomgqigqo akuwo njengamanje, kubukeka ezoliphula irekhodi likaVilakazi.
