Kukhonye uRiveiro noRibeiro emiklomelweni yePSL
- Intatheli yeLISENETHINI
Umqeqeshi we-Orlando Pirates uJose Riveiro unikezwe umklomelo wokuba nguMqeqeshi weNyanga kwiBetway Premiership ngoSepthemba no-Okthoba 2024.
Lo mqeqeshi odabuka eSpain uhole iPirates ngobunono, iqala isizini ka-2024/25 yeBetway Premiership ngegiya eliphezulu.
Emidlalweni eyisikhombisa, iPirates ayikehlulwa futhi isayinqobe yonke kanti yiyo eqhwakele kwilogi njengamanje.
URiveiro unqobe le ndondo ebangiswa ngumqeqeshi wePolokwane City uPhuti Mohafe noweMamelodi Sundowns, uManqoba Mngqithi. .
Khonamanjalo, umdlali weMamelodi Sundowns uLucas Ribeiro Costa uqokwe njengoMdlali weNyanga kwiBetway Premiership.
Lesi sihlabani esizalwa eBrazil siqhubeke nefomu yaso yangesizini edlule, sashaya amagoli amane futhi sakhela ozakwabo amabili.
URibeiro Costa uphume nale ndondo kade eyibanga nabadlali be-Orlando Pirates uSipho Chaine, uRelebohile Mofokeng, noDeon Hotto.
Umdlali weStellenbosch FC, uFawaaz Basadien yena uzihlomulele ngomklomelo weGoli leNyanga.
Lokhu kulandela igoli lakhe elimangalisayo alishaya bebhekene neCape Town City e-Athlone Stadium ngoSepthemba 25.
Leli goli likaBasadien belibanga nelika-Andile Jali weChippa United alishaya bebhene nePirates, nelikaMohau Nkota.
