Kubatshazwa ‘ubuhlathi’ bomhlaziyi weBafana
Umhlaziyi wamavidiyo we-Bafana Bafana, uSinesipho Mali usequbule inkulumompikiswano ezinkundleni zokuxhumana.
Lokhu kungemuva kokuvela kwevidiyo emkhombisa ethethiswa ngesikhathi ephendula abebebagxeka ngaphambi kokuqopha umlando kwiNdebe yoMhlaba.
Lesi sigameko senzeke ngoLwesine ekuseni eMonterrey, ngemuva kokuba iBafana ihlule iSouth Korea ngo 1-0.
UMali, obejabule kakhulu ngale mpumelelo, uhlulekile ukuzibamba ngesikhathi ekhuluma nabezindaba.
“Abanye basemakhaya bayakhefuza nje. Thina silapha senza umsebenzi, yilowo umehluko.
“Lena yiNdebe yoMhlaba yami yesibili neqembu elikhulu, sesifinyelele esigabeni esilandelayo,” kusho uMali.
La mazwi avele adonsa amehlo esikhulu esiphezulu seSAFA, uLydia Monyepao, obemi ngemuva kwakhe.
Ebona ukuthi le nkulumo yakhe ingase idale umsindo, uMonyepao ube esengenelela ezama ukumthulisa ethi: “Hhayi wena maan!”
Nokho uMali akazange athule, yize izikhulu zeqembu bezizama ukumsusa phambi kwamakhamera.
“Mabakhulume. Cha, mabakhulume, mabakhulume,” kuqhubeka yena edudulwa eyosithela.
Le vidiyo isisabalale kakhulu ezinkundleni zokuxhumana, lapho abanye bencoma isibindi sakhe sokuvikela iqembu.
Nokho kunabanye abaphakamisa imibuzo ngobungcweti bakhe njengoba eyingxenye yabaphathi kwi-Bafana Bafana.
- FUNDA NALA | Sebekhwele badilika kumqeqeshi abaseSouth Korea
Bekungokwesibili uMali engenela ngendlela efanayo, njengoba ephinde waphazamisa ingxoxo yeSuperSport TV phakathi kwengwazi yeBafana uSiphiwe Tshabalala nomethuli uJulia Stuart.
Uqhamuke esegxuma phakathi kwabo wamemeza wathi: “Abangaphinde basisole! Bona bakhuluma besemakhaya, thina siyasebenza lapha!”
- EZISHISAYO| Cofa lapha usithole kuWhatsApp
