ISundowns ithe ‘choo’ ejezini elenzelwe uKidSuper
IMamelodi Sundowns ithathe isinqumo ebesingalindelekile ngaphambi kokuqala kwemidlalo yeFifa Club World Cup ka-2025.
Lezi zinkunzi zaseNingizimu Afrika ngeke ziligqoke ijezi elikhethekile lePuma elenziwe yiciko elihlonishwa emhlabeni jikelele, uKidSuper.
Leli jezi elidizayinwe ngokuhlukile belenzelwe ukuthi iSundonws iswenke ngalo kulo mqhudelwano oqhubekayo e-United States.
Esikhundleni salokho, iMamelodi Sundowns izoqhubeka nokusebenzisa ijezi layo lasekhaya lePuma ebilisebenzisa emidlalweni yasekhaya kule sizini.
Emidlalweni yasekuhambeni, izosebenzisa elisha, ezobe ilisebenzisa emidlalweni yasekuhabeni ngesizini ezayo elingakethulwa ngokusemthethweni.
Lesi sinyathelo senza iMamelodi Sundowns kube ukuphela kweqembu elixhaswe yiPuma kulo mqhudelwano ukwenqaba leli jezi elenziwe uKidSuper.
Amakilabhu afana neManchester City, iBorussia Dortmund, i-Al Hilal, iMonterrey, iRed Bull Salzburg, nePalmeiras wonke awamukele amajezi enziwe yileli ciko.
I-Puma ihlanganyele noKidSuper ukukhipha amajezi ahlukile, ngenhloso yokubungaza lo mqhudelwano.
Kodwa iSundowns inqume ukuya ukungalamukeli leli jezi. Iqembu alikasikhiphi isizathu esisemthethweni salokhu.
Kodwa-ke, kukholakala ukuthi ayijabule ngokugcwele ngedizayini eyenziwe uKidSuper ejezini layo.
Yize namanye amakilabhu axhaswe yiPuma kubikwa ukuthi abenokukhononda ngawawo, kodwa ekugcineni akhethe ukuwagqoka.
Isinqumo seSundowns sisuse inkulumo-mpikiswano phakathi kwabalandeli kezinkundleni zokuxhumana.
Abanye bayayeseka ngokungalisebenzisi leli jezi, kanti abanye baphoxekile ngokuthi ayivumanga ukwamukela ubuciko obuhlukile.
Nakubalandeli bakuleli leli jezi leSundowns lisuse ukukhuluma, futhi abantu abaningi baveze ukungalizwa kahle.
Khonamanjalo, iMamelodi Sundonws iwuqale kahle umkhankaso wayo kulo mqhudelwano, ishaya i-Ulsan UD ngo 1-0.
Lokhu kuyenze yaqhwakela kuGroup F njengoba inamaphuzu amathathu, futhi isisethubeni elihle lokudlulela esigabeni somkhumulajezi.
