IStellies ifongqa isigqoko kwi-Orlando Pirates ngomgadli
Ngemuva kokushweba uSinoxolo Kwayiba, iStellenbosch FC seyibeke amehlo ayo komunye umgadli we-Orlando Pirates njengoba ibheke ukuqinisa iqembu.
Leli qembu laseWestern Cape lisanda kudedela abadlali ababili abahlaselayo oLesiba Nku noLehlohonolo Mojela.
Liphinde ladayisela i-Orlando Pirates u-Andre de Jong okukholakala ukuthi kulishiye lixega kancane phambili.
Manje iDiski Times ibika ukuthi iStellies – esanda kuqasha uGavin Hunt njengomqeqeshi – isifuna umgadli kanti amehlo ayo abheke kuTshegofatso Mabasa.
Lo mgadli ulizwa ngendaba ijezi kwi-Orlando Pirates kule sizini njengoba umqeqeshi u-Abdeslam Ouaddou esebenzisa u-Evidence Makgopa noYanela Mbuthuma.
Kuvela ukuthi iStellies ifuna ukubolekwa yena kuze kuphele isizini okuyinto iPirates okungenzeka iyivume ukuze abuyise umgqigqo wakhe.
Lo mbiko uthi iStellies ilwela ukuthi imthole kulo leli sonto uMabasa njengoba seyiqalile amalungiselelo ayo okuqedela le sizini.
Leli qembu alimile kahle kwilogi kanti libheke isiqalo esisha ngemuva kokushiywa uSteve Barker obesehlale isikhathi eside kuyo.
Ngaphambi kokujikela kuMabasa, kuvela ukuthi uHunt ubenxuse abaphathi ukuthi bamzamele uKwayiba kuyo iPirates.
FUNDA NALA | U-Andre de Jong uveza okumqomise iPirates
Nokho lokho akuphumelelanga njengoba edayiselwe iqembu abethengwe kulo ekuqaleni kwesizini iChippa United ngemuva kokuhluleka ukungena eqenjini kwiBucs.
ZITHOLE ZISHISA: Cofa lapha usithole kwiWhatsApp Channel yethu
