UPitso uhlonza iqhawe leBafana, uncoma uBroos
Owayengumqeqeshi weBafana Bafana uPitso Mosimane usencome kakhulu umsebenzi kaHugo Broos.
Lokhu ukwenze ngemuva kokuba iNingizimu Afrika iqophe umlando ngokungena esigabeni somkhumulajezi okokuqala kwiNdebe yoMhlaba.
Kodwa uthi iqhawe langempela ngesikhathi iBafana ishaya iSouth Korea kube ngumdlali we-Orlando Pirates, uThalente Mbatha.
Ekhuluma kwiSmash Sports, u-Pitso Mosimane uthe u-Hugo Broos uphendule abebemgxeka ngendlela efanele, ngokwenza umsebenzi enkundleni.
“Lona bekungumdlalo okhombise ubuhlakani obukhulu bukaHugo Broos,” kusho uMosimane.
“Uphinde wakhombisa ukuthobeka nokuhlonipha. Baningi ababegxeka indlela esaqala ngayo iNdebe yoMhlaba nendlela ebesidlala ngayo.
“Kodwa uvele walungisa amaphutha ngaphandle kokuzikhukhumeza.”
U-Pitso Mosimane uthe ukubuyela ohlelweni olujwayelekile lokudlala kuka-Hugo Broos kube yisinqumo esenze umehluko omkhulu.
“Ungumqeqeshi onamava. Ubuyisele iqembu ohlelweni ebelivele lilisebenzela,” kusho uMosimane.
“Uqale ngoRelebohile Mofokeng phakathi nenkundla, uOswin Appollis noThapelo Maseko ezimpondweni, kwathi phambili wasebenzisa umgadli oyedwa.”
Nokho uthe iqhawe elinganconywanga ngemuva kwalo mdlalo kube uMbatha.
Njengoba uTeboho Mokoena ebemisiwe, uMbatha ubambisane noSphephelo Sithole phakathi nenkundla, lapho enze khona umsebenzi omkhulu wokuvimba iSouth Korea.
“Kodwa iqhawe langempela kube uThalente Mbatha,” kuqhuba uMosimane.
- FUNDA NALA | UBroos ‘ugive’ iFifa ngolukaZwane
“Uma edlala awumboni kakhulu ngoba wenza umsebenzi wakhe buthule.
“Kodwa uma engekho yilapho wonke umuntu ebona ukuthi ubaluleke kangakanani. Ube yiqhawe elinganakwanga kulokhu kunqoba.”
- EZISHISAYO| Cofa lapha usithole kuWhatsApp
