IPirates iqashe obekwiDDC yeSuperSport, uMakhanya yena?
I-Orlando Pirates isiqashe uRoscoe Krieling, obengumqeqeshi weqembu lenkulisa yeSuperSport United ebelidlala kwiDStv Diski Challenge.
Lesi yisinyathelo esibukeka sizoanyakazisa isakhiwo sethimba labaqeqeshi kwi-Orlando Pirates ngaphambi kwesizini entsha.
UKrieling, ohole iSuperSport United yanqoba isicoco DDC ngesizini ka-2022/23, ukuqinisekisile ukushintshela kwakhe kumaBhakabhaka kuleli sonto.
Iminyaka emine ayihlale kuMatsatsantsa ibe ngeyempumelelo njengoba ekhiqize abadlali abangaphezu kuka-20 abanyuselwe eqenjini elikhulu.
Kulaba kukhona uThapelo Maseko osekwiMamelodi Sundowns, uShandre Campbell osekwiClub Brugge eBelgium, noNeo Rapoo, osanda kunqoba iCaf Under 20 Africa Cup of Nations naMajita.
Ukufika kukaKrieling kwi-Orlando Pirates sekuqubule ukuqagela ngekusasa likaJoseph “Duku Duku” Makhanya ocija iqembu leDDC futhi oyingwazi yekilabhu.
UMakhanya naye ube nempumelelo encomekayo kule minyaka emithathu engumqeqeshi weDDC kwiPirates.
Ngaphansi kukaMakhanya, amathalente afana noRele Mofokeng, uMohau Nkota, uSimphiwe Selepe, noMbekezeli Mbokazi asenyuselwe eqenjini elikhulu.
Kodwa-ke, ukubonakala kwakamuva kukaMakhanya eqenjini elikhulu ngesikhathi liqala amalungiselelo esizini ezayo kwenze kwabonakala engase enyuselwe kulo.
Akukacaci ke noma uMakhanya uhambile yini nesikwati esilibangise eSpain noma unikezwe umsebenzi wokugada abadlali abasalile okumele bazicije kuleli.
Abadlali abashiywe ngemuva kubalwa kubo uMonnapule Saleng, u-Enock Sakala, no-Abdoulaye Mariko.
Nokho uSaleng kulindeleke ukuthi ajoyine iqembu eliseMarbella, eSpain ngokuhamba kwaleli sonto.
USakala, ongumgadli odabuka eZambia, noMariko ongumdlali wasesiswini waseMali nabanye bona bazoziqeqesha kuleli.
Njengoba sekufike uKrieling futhi kungenzeka uMakhanya akhushulelwe eqenjini elikhulu, kuyacaca i-Orlando Pirates ayisinisi mahleza kulokhu.
Ibumba kabusha izinkulisa zayo futhi iqinisa nethimba labaqeqeshi eqenjini elikhulu eliholwa u-Abdeslam Ouaddou njengoba ilungiselela umkhankaso onzima ka-2024/25.
