Ugile izimanga eshonelwe nguyise obe yiqhawe leStellies
UMthetheleli Mthiyane uthi indondo yokuba nguMdlali oVelele ayithole emdlalweni weMTN8 uhlonipha ngaye uyise osanda kushona.
Lo mdlali nguye oshaye igoli eliqinisekise ukuthi iStellenbosch FC singena kowamanqamu kwiMTN8 la izobhekana khona ne-Orlando Pirates.
UMthiyane – oneminyaka engu-24 ubudala – ushaye igoli lokuqala bebambana neSekhukhune United ngo 1-1 emdlalweni womlenze wesibili kweyandulela owamanqamu ngoMgqibelo ebusuku.
Udedele ishodi elihle elidla utshani engaphandle kwebhokisi leSekhukhune ngomzuzu ka-22. Leli goli lenze kwacaca ukuthi iStellies iya koqamanqamu.
Lisho ukuthi iSekhukhune kumele ishaye amagoli amane ukuze kube yiyo edlulayo njengoba yayihlulwe ngo 2-0 emlenzeni wokuqala eKapa.
USiphesihle Mkhize nguye oshayele iSekhukhune elokulinganisa kulo mdlalo ngomzuzu ka-66 – kwasho khona ukuthi sekungelokubika nje ekhaya.
Ekhuluma ngemuva komdlalo, uMthiyane – osayine kwiStellies esuka kwiMilford FC – uveze ukuthi usanda kushonelwa nguyise.
“Le ndondo isho lukhulu kimi. Empeleni bonke abadlali (beStellies) bafanelwe ukuthiyothola kuyikho ke ukuthi kumele itholwe oyedwa.
“Ngihlonipha ngayo ubaba osanda kushona. Ngiyazi lapho ekhona ujabule ukungibona ngiphumelela,” kusho uMthiyane.
“Ngiyabonga nasemndenini wami ngokungeseka njengoba ngibhekene nalesi simo esinjena.”
FUNDA NALA | U-Ouaddou usola inhlese yokucwasa kwabamgxekayo
UMthiyane usayinwe uSteve Barker ukuzovala isikhala sikaSihle Nduli oshiye leli qembu wayojoyina i-Orlando Pirates.
Ufike wasivala khaxa lesi sikhala futhi udlala sengathi kade afika kuleli qembu njengoba esezodlala owamanqamu nje.
