Iphenathi iyona, iKazier Chiefs bekumele idlale ingasaphelele
Isinqumo sokubekela iKaizer Chiefs iphenathi esiwombeni sokuqala emdlalweni wamanqmau weNedbank Cup la ihlule khona i-Orlando Pirates besilungile.
Kodwa iKaizer Chiefs bekumele idlale ingxenye enkulu yalo mdlalo inabadlali abangu-10 njengoba omunye wabadlali bayo ubefanelwe yikhadi elibomvu.
Lokhu kuvezwe ngowayengunompempe wePSL manje osengumhlaziyi kamabonakude uVictor Hlungwani kwiSoccer Zone ngoMsombuluko ebusuku.
IChiefs ihambe phambili kulandela ukuthi uPule Mmodi edlaliswe kabi ngesikhathi engena ebhokisini le-Orlando Pirates ngasekuqaleni kwesiwombe sokuqala.
UGaston Sirino nguye obe esethatha leyo phenathi wayibeka enethini, wabeka Amakhosi ethubeni elihle lokuwina indebe yawo yokuqala eminyakeni engu-10.
I-Orlando Pirates ilinganisile ngo-Evidence Makgopa ngaso isiwombe sokuqala, kodwa igoli likaYusuf Maart ngasekupheleni komdlalo liweze Amakhosi.
Abanye, ikakhulukazi abalandeli bePirates, babone ukuthi iphenathi bekungesona isinqumo esifanele njengoba uMmodi ezikhube yena wawa.
Kodwa ehlakaza lesi sigameko, uHlunguni ukhombise ukuthi umdlali wasemuva wePirates uDeano van Rooyen empeleni umthintile, okuphethe ngokuthi akhubeke.
“UPule Mmodi udlaliswe kabi nguDeano van Rooyen ebhokisini ngesikhathi i-Orlando Pirates ihlulwa kowamanqamu weNedbank Cup.
“Abanye bathi, ‘asibonanga emthinta, lo mdlali uzikhubekele ngokwakhe’.
“Nangu omthintile (ekhombisa lesi sigameko kwividiyo). Uyayibona. Yilona othintana naye. Yilokhu okubonwe unompempe.
“Ngakho yisinqumo esifanele sikanompempe uMasixole Bambiso,” kuchaza uHlungwani.
Kodwa ngisho nangemva kokuba eseyichazile, abanye babesenomuzwa wokuthi bekungesona isinqumo esifanele, bethi uthinteke kancane ukuthi ubesengaze awe.
Bacaphune uHlunguni ezigamekweni ezedlule lapho ebize khona amaphutha afana nalawa ngokuthi athambile futhi angakufanele ukujeziswa.
Kwesinye isigameko uWandile Duba weKaizer Chiefs udlalise kabi uMakhehlene Makhaula wePirates kanti uHlungwani ukholwa ukuthi bekumele akhishwe ngekhadi elibomvu.
“Lokhu ukuziphatha okunodlame… Lokhu ukulungisa okungalungile. Bekufanele kube yikhadi elibomvu eliqondile ngokunyathela kwakhe omunye umdlali,” kusho yena ngalesi sigameko.
Zombili lezi zigameko, ukube isinqumo sihambe ngenye indlela, bezingaba nomthelela ohluke kakhulu emphumeleni womdlalo.
Zenyuse izicelo zokuthi akusheshiswe indaba yokwethulwa kwe-VAR ebholeni lakuleli njengoba abalandeli bebona sengathi amaqembu abo ahlezi egqilazwa onompempe.
