Inkakha ithi iChiefs izigwaze ngowayo iphuma kwiConfed Cup
Ukucubungulwa kwesimo esiholele ekuphumeni kweKaizer Chiefs kwiCaf Confederation Cup sekuthathe elinye igxathu.
Ingwazi yebhola laseNingizimu Afrika uMlungisi “Professor” Ngubane isiveze imibuzo ngohlaka lokudlala lwaleli qembu.
Yize beyiye e-Egypt izihola phambili kuGroup D, iChiefs ihlulwe ngo 2-1 yiZamalek ngoMgqibelo ntambama.
Lo mphumela, nalo we-Al Masry eshaye iZESCO United ngo 2-0 kwenze yehlela endaweni yesithathu kuleli qoqo.
Lokhu kuyishiye ilingana ngamaphuzu ne-Al Masry, kodwa yasala ngenxa yomehluko wamagoli.
KuNgubane, indlela iChiefs ehlulwe ngayo yiyo eshiye uNgubane ekhexile, wathi akabonanga ukuzimisele abekulindele.
UKUVUZA
Ekhuluma neKickOff, uNgubane uzwakalise ukudideka ngokuthi iqembu elidinga iphuzu elilodwa nje kuphela ukuze liphumelele lenza kanjani ukuthi livuleke.
Uthi iChiefs idlalise okweqembu okumele linqobe kumnyama kubomvu kuzokuvala emuva ukuze lidlale ngokulingana e-Ismailia.
“IKaizer Chiefs ungene kulowa mdlalo ingenalo uhlaka oluphusile lomdlalo,” kuphawula uNgubane.
“Ngiwubukile umdlalo, kodwa angizange ngiqonde ukuthi kungani iqembu ebelidinga iphuzu elilodwa kuphela livuleke kangaka.
“Okwamanje, iChiefs ayinaso isitayela sokudlala. Uma uzobuka iSundowns nePirates, uyazi ukuthi ungalindela ibhola elinjani.”
IZINSOLO ZOKUDEMBESELA NGABOMU
UNgubane akazange agcine ngokusola ukuntuleka kohlelo namacebo kulo mdlalo.
Uphakamise nokuthi usola ukungezwani kwangaphakathi eqenjini, athi kungenzeka kudalwa amaholo angalingani.
Uthi uma kukhona isimo esinjalo eqenjini, abanye abadlali abazimiseli ngokugcwele nangendlela okulindeleke ngayo.
- Ukungazimiseli: Uveze ukuthi “abadlali obulindele ukuthi baphakame ngesikhathi iqembu libadinga kakhulu” bahlulekile ukuziveza eCairo.
- Umbuzo ngabadlali abasebancane: UNgubane uqhathanise ukuma ndawonye kwabadlali abasebancane beChiefs nokukhula ngokushesha kwabe-Orlando Pirates.
Ubuze ukuthi kungani abafana baseNaturena bona bengafiki ezingeni elifanayo. - Ihlazo elibi: Ugqamise ukuphoxeka kweqembu ngokuthi liqale usuku lokugcina lwemidlalo yamaqoqo lisendaweni yokuqala kodwa lwaphela selisendaweni yesithathu.
INDLELA EYA PHAMBILI
Abafana baseNaturena abanaso isikhathi sokuzikhotha amanxeba ngemuva kwalo mphumela.
Ezinsukwini ezingu-12 nje kuphela, ebekhishiwe emiqhudelwaneni emibili yezindebe abebebhekiwe kuyo – iNedbank Cup neConfed Cup.
Amehlo abo manje sekumele aphendukele kwiBetway Premiership, lapho njengamanje behlezi endaweni yesine ngamaphuzu angu-30.
ILINDWE EYEGQUBU
Emdlalweni wabo olandelayo, bazohlangana neqembu okuyilo elibagile kwikwiNedbank Cup, iStellen bosch FC ngoFebhuwari 24.
Lo mdlalo ungowasekhaya kwiKaizer Chiefs kanti uhlelelwe ukuba seFNB Stadium kanti uzoqala ngo-7.30 ebusuku.
Ezinsukwini ezine ukusuka lapho, bazodlala nesitha sabo esikhulu i-Orlando Pirates enkundleni efanayo.
IZEMBE LILOLIWE
Ukuphawula kukaNgubane kukhombisa ukukhula kwengcindezi eqenjini elibonakala lingenalo uhlaka lokudlala oluthembekile.
Njengoba sekusele isicoco seligi kuphela ukuthi basidlalele, ingcindezi kubaqeqeshi oCedric Kaze noKhalil Ben Youssef iphezulu.
Kuzomele bazame kule midlalo yeligi ukukhombisa ukuthi banalo ihlaka lokudlala futhi imiphumela ayiqhamuki ngenhlanhla.
FUNDA NALA | UMokwena uphawula ngokuhlaselwa uCardoso
Uma behlulekile ukukwenza lokho kule midlalo emibli elandelayo, akungabazeki ukuthi izinto zizobashubela kakhulu eNaturena.
