IPirates icubuza amagade ngomgadli kwiPolokwane
I-Orlando Pirates ingase ifake omunye wabagadli bayo abayigugu emzamweni wokucubuza amagade kwiPolokwane City ukuze ibadayisele omunye wabadlali bayo.
Imibiko yakamuva iveza ukuthi uZakhele Lepasa angase abe yingxenye yezingxoxo zokuthi aye kwiPolokwane ukuze iPirates ithole umdlali wasemuva uThabang Matuludi.
ULepasa, ongumgadli osezingeni eliphezulu, uyalulama ekulimaleni eqakaleni okumhlalise ngaphandle izinyanga eziyisishiyagalolunye.
IPirates ibona ukubolekiswa kwakhe kwiPolokwane njengethuba lokuthi athole isikhathi sokudlala ukuze abuyele efomini yakhe.
Lo mdlali oneminyaka engu-27 ubudala, obemataniswa neSuperSport United, akakaze adlale kwiPirates kule sizini.
Umdlalo wakhe wokugcina wawungo-Ephreli nyakenye bebhekene neMoroka Swallows, lapho angena khona esuka ebhentshini ngasekupheleni komdlalo.
Khonamanjalo amaBhakabhaka akuqinisekisile ngeSonto ukuthi uLepasa uyelulama futhi usezoqala nokujima nozakwabo.
“UZakhele Lepasa uyelulama kahle,” kusho iPirates esitatimendeni.
“Uqale ukugijima okukaliwe enkundleni kodwa kuzoya ngokukhuphuka kancane kancane.”
Lesi sinyathelo singase sivumele iPirates ukuthi ithole uMatuludi osenekusikhathi eside imfuna ngesikhathi sisiza uLepasa ukuthi abuyele esimweni.
Ukudlala eqenjini la ingcindezi ingeke ibe phezulu kakhulu kuzomsiza ukuthi abuyele efomini kahle.
