Ingwazi ivikela uKhanyisa Mayo ‘oshwebise’ iChiefs igoli
Njengoba umgadli weKaizer Chiefs, uKhanyisa Mayo ezithole egxekwa ngabalandeli, bemsola ngokuba nomona nokunye – owayengukaputeni we-Orlando Pirates uBenedict “Tso” Vilakazi uyamvikela.
Lo mgadli oneminyaka engu-28 ubudala ube neshwa ngesikhathi ethi ‘untshontsha igoli’ ebelishaywa nguPule Mmodi kodwa kwambhedela.
UKhanyisa Mayo ubekade esendaweni engamfanele ngesikhathi ethinta ibhola selivele seleqa umugqa kuzoba yigoli.
Unompempe ube eselichitha lelo goli ngoba selithintwe ngumdlali ongafanele. Abahlaziyi beSuperSport TV bathe ukube ubengalithintanga ibhola, belizobalwa igoli.
Lesi sigameko sincishe iChiefs amaphuzu amathathu njengoba umdlalo naMaZulu FC ugcine uphele zibambene ngo 1-1.
Ekhuluma kwi-iDiski TV, uVilakazi uthe yena uyakuqonda okwenze uKhanyisa Mayo athathe lesiya sinqumo, ethi kube wumuzwa wokuba ngumgadli.
WINA | Ithuba lokuwina neVicks neLisenethini
“Yisimo esinzima lesiya. Uma ungumgadli, uhlezi ufuna ukufaka igama lakho ohlwini lwabashaye amagoli,” kuchaza uVilakazi.
“Kodwa ngeshwa lakhe, akazange asifunde kahle isimo. Ibhola bese livele liyoweqa umugqa – besingekho isidingo sokulithinta.
“Ngaphandle uma ubona kukhona okuzolivimba, njengomoya noma isitobha, kumele uliphelezele nje ungalithinti.”
UVilakazi uvumile ukuthi naye wake wehlelwa yisimo esifanayo esadlala, yize yena wayesendaweni emfanele futhi igoli labalwa.
“Kade ngitshela uJunior Khanye ukuthi nami ngake ngaleba igoli likazakwetu, kodwa umehluko wukuthi mina ngangisendaweni engifanele.
“Abagadli bafuna amagoli, futhi indlela uMayo enze ngayo yinto ejwayelekile kumgadli ohlezi efunna elambele ukushaya inethi.”
FUNDA NALA | OweChiefs uzifanisa nembongolo
Ngemuva kwalesi sigameko, uMmodi ubonakalile ukuthi siyamkhubaza emoyeni lesi senzo sikaKhanyisa Mayo ngendlela abegxuma ngayo echitha nezandla.
“Ngibone noMmodi ekhala kungathi uthi, ‘liyeke ndoda, ulithintelani’. UMayo kuzodinga ehlise umoya bese eyafunda – kwesinye isikhathi igoli alikudingi ukuthi ufake isandla.”
