Iguqe ilwile iMilford ejeziswe uMntambo
ULinda Mntambo uqhubekile nobuqhawe bakhe kwiSekhukhune United, esiza leli qembu laseLimpopo ukuthi lidlulele emzuliswaneni olandelayo weNedbank Cup.
Lo mdlali oneminyaka engu-35 ubudala osephenduke umgadli ushaye amagoli amabili asize iBabina Noko yadlula eqenjini elinenkani iMilford FC ePrincess Magogo Stadium ngeSonto.
Lo mdlalo bekungowokugcina emidlalweni yesigaba seLast 16 kwiNedbank Cup kanti ubuzoveza ukuthi ngubani ozobhekana neMamelodi Sundowns kuma-quarter finals.
Lo mdlalo ubambezelekile ngenxa yezinkinga zeRoyal AM. IRoyal AM ayikwazanga ukudlala umdlalo wayo womzuliswano wokuqala ibhekene neMilford emasontweni ambalwa edlule.
Kodwa kuleli sonto iPSL inqume ukukhipha iRoyal AM emqhudelwaneni, yaqhubekisela phambili iMilford ukuthi ibhekane noSekhukhune.
IMilford, exoshe umqeqeshi wayo uMandla Qhogi kuleli sonto, ilwe kanzima kulo mdlalo kodwa isipiliyoni seSekhukhune sahlala obala.
Iholwa ngusihlalo wekilabhu, uPupuma Xhanti, iMilford iyithwalise nzima iBabina Noko ngasekupheleni komdlalo.
ULinda Mntambo ushaye amagoli amabili ngasekuqaleni komdlalo – ngomzuzu ka-20 noka-34 – kanti yiwo lamagoli aweze iBabina Noko.
UMenzi Chili ushaye elokubika ekhaya leMilford ngomzuzu ka-43, yaphuma ilwile kulo mqhudelwano.
