IPirates yemukela abadlali abasha, idedela abahlanu

I-Orlando Pirates isiqinisekisile ukufika kwabadlali abane abasha njengoba iqhubeka nokuqinisa iqembu elizovikela isicoco seBetway Premiership ngesizini ezayo.

Ngemuva kwamasonto amaningi amahlebezi, iPirates isimemezele ngokusemthethweni ukusayinwa kwalaba badlali:

UMthetheleli Mthiyane osuka kwiStellenbosch FC, uSbangani Zulu osuka kwiRichards Bay, noBohale Ngwato noGhampani Lungu abasuka kwiSiwelele FC.

Ukufika kukaMthiyane kuhambisane nokuhamba komdlali wasemuva uThabiso Lebitso, osejoyine iStellenbosch FC njengengxenye yesivumelwano sokushintshana ngabadlali.

Ngesikhathi abalandeli bejabulela ukufika kwabadlali abasha, i-Orlando Pirates iphinde yamemezela ukuhamba kwabadlali abahlanu ekupheleni kwesizini.

Abadlali abangasayona ingxenye yeBhakabhaka nguBandile Shandu, uSipho Mbule, uTshegofatso Mabasa, uKarim Kimvuidi noDeivi Miguel Vieira, owaziwa ngoGilberto.

Ukuhamba kukaMbule noMabasa kubonakala kusazoba nemvunge phakathi kwabalandeli kwazise bobabili babe nomthelela omuhle eqenjini ngezikhathi ezahlukene.

I-Orlando Pirates ibonge bonke laba badlali ngomsebenzi wabo ngesikhathi besagqoke imibala yeqembu, yabafisela okuhle emisebenzini yabo ezayo.

• FUNDA NALA | UPienaar uphawula ngoMofokeng

Njengoba sekufike abadlali abasha futhi kwaphuma abanye, kuyacaca leli qembu lizimisele ngesizini ezayo.

Umqeqeshi u-Abdeslam Ouaddou useqalile ukulungiselela impi entsha yokuvikela isicoco seligi neyokuzingela eseCAF Champions League ngesizini ka-2026/27.

• EZISHISAYO | Cofa lapha usithole kuWhatsApp