UPienaar uveza umbono ngoMofokeng okubhekwe lukhulu kuye
Ingwazi yeBafana Bafana uSteven Pienaar ikholwa ukuthi isihlabani se-Orlando Pirates uRelebohile Mofokeng angafika ezingeni eliphezulu.
Uthi lesi sihlabani esisesincane sinakho konke okudingekayo ukuze sibe ngomunye wabadlali abahamba phambili abake bakhiqizwa yiNingizimu Afrika.
UPienaar useMexico njengengxenye yeqembu lezingwazi zeBafana Bafana zango-2010.
Uthi izwe kumele liqaphele indlela eliphatha ngayo lo mdlali oneminyaka engu-21 ukuze lingamfaki ngaphansi kwengcindezi engadingekile.
U-Relebohile Mofokeng uzobe engomunye wabadlali iNingizimu Afrika ezobeka amathemba ayo kubo kwiNdebe yoMhlaba.
Lokhu kulandela isizini emangalisayo abe nayo nePirates, lapho esize khona leli qembu lanqoba isicoco seBetway Premiership okokuqala eminyakeni engu-14.
Lo mdlali odabuka eSharpeville usephenduke isithandwa sabalandeli eminyakeni embalwa nje engene esigabeni esiphezulu.
Kodwa u-Steven Pienaar, owadlala emaqenjini amakhulu ase-Europe afana ne-Ajax Amsterdam, Everton, Borussia Dortmund neTottenham Hotspur, unesexwayiso.
“URele unazo zonke izimfanelo zokuba ngomunye wabadlali abahamba phambili eNingizimu Afrika.
“Ungumdlali okhethekile futhi kufanele simvikele,” kusho uPienaar.
“Akufanele simfake ngaphansi kwengcindezi ngokumthwesa umqhele kungakafaneli.
“Kumele simnike ithuba lokudlala ibhola lakhe. Unekhono, akesabi futhi lesi yisikhathi sakhe sokukhombisa umhlaba ukuthi uphetheni.”
U-Steven Pienaar uthe iNdebe yoMhlaba izonika u-Relebohile Mofokeng inkundla enkulu yokuziveza.
Wathi kodwa impumelelo yakhe izoncika ekutheni abantu bayamsekela yini ngaphandle kokumcindezela ngokumnika umthwalo ongaphezu kwamandla.
“Makadedelwe adlale. Isikhathi sakhe sesifikile,” kuphetha uPienaar.
