IChiefs ifongqa isigqoko kwiSpurs ngomunye umdlali
– Intatheli yeLisenethini
IKaizer Chiefs isiqale izingxoxo neCape Town Spurs mayelana nokudayelana ngomdlali wasesiswini u-Asanele Velebayi.
Yize iSpurs igawulwe yizembe ngesizini edlule, lo mdlali oneminyaka engu-21 ukhombise ithalente elikhulu, waba ngomunye wabadlali abagqamile kuleli qembu.
Indlela adlale kahle ngayo imenze waba ngomuunye wababizelwe eqenjini lesizwe iBafana Bafana ebelidlala kwiCosafa Cup muva nje ngaphansi komqeqeshi uHelman Mkhalele.
AmaKhosi abukeka ezimisele ngokuqinisa isikwati somqeqeshi omusha uNasreddine Nabi ozobe ehola leli qembu ngesizini ka-2024/25.
Sebevele sebemtholele unozinti uFiacre Ntwari weTS Galaxy noBongani Sam odlala emuva kwesokunxele obekwi-Orlando Pirates.
NgoLwesine, iSpurs imemezele ukuthi seyivumile ukudayisela lezi zinkunzi zaseSoweto umdlali wasemuva uRushwin Dortley.
Nokho kulokho kudayiselana sekusele ukuthi iChiefs ivumelane ngomdlali ngomholo neminye imihlomulo.
Manje iSABC Sport ibika ukuthi izingxoxo phakathi kweSpurs neChiefs ngoVelebayi zenziwa esithe, ngokufanayo nezingxoxo zikaDortley.
UVelebayi, odlale imidlalo engu-24 kuyona yonke imiqhudelwano ngesizini edlule ngemuva kokukhushulelwa eqenjini elikhulu ngo-Okthoba, ubonakala enhgumdlali othembisayo wakusasa.
IChiefs ikholwa wukuthi engathuthuka kakhulu ngaphansi komqeqeshi wayo odabuka eTunisia, uNabi.
OLUNYE UDABA:Â Iqinise ngomunye umgadli waseBrazil iSundowns
Kulindeleke ukuthi leli qembu lifake isicelo esisemthethweni ngoVelebayi uma iSpurs isivumile ukuthi ingamdayisa.
