Ibhola alinamngani, ungabuza uMbule noMatlou bazokutshela

Ibhola liyakwazi ukuguquka ngokushesha, kanti u-Sipho Mbule no-George Matlou bangofakazi bakamuva balokho.

Laba badlali bobabili bazithole sebengaphandle kwamaqembu abo aseSoweto njengoba i-Orlando Pirates idedele uMbule kwathi iKaizer Chiefs yona yavalelisa kuMatlou.

Okugqamayo ngalaba bobabili wukuthi bake bazwakalisa uthando olukhulu emaqenjini abo, baze bagcona izimbangi ngesikhathi izinto zibahambela kahle.

Ngasekuqaleni kwesizini edlule, u-Sipho Mbule waba sematheni ngesikhathi iPirates iwina iMTN8 okwesine kulandelana. 

Ekhomba ibheji legolide elaligqokwe yiPirates, washaya isifuba wathi: “Ayigqokwa olamthuthu le!”

Lawo mazwi aba sematheni futhi abalandeli bePirates bawajabulela kakhulu, kwagcina kungathi wayewabhekiswe kwiChiefs.

Ngakolunye uhlangothi, uMatlou naye wazifaka zaphelela kubalandeli bePirates ngesikhathi elingisa indlela u-Amale Mukoko waseSt Eloi Lupopo ayebagcone ngayo iPirates ngemuva kokuyikhipha kwiCaf Champions League.

Lesi senzo sika-George Matlou sahunyushwa njengokuhlekisa ngePirates, kwadala umsindo omkhulu ezinkundleni zokuxhumana.

Kodwa izinto sezishintshe kakhulu manje. UMbule usephumile kwiPirates, uMatlou naye usekhishiwe kwiChiefs.

Futhi manje bobabili sebebheke emakethe befuna amakilabhu amasha abazodlala kuwo.

Ngesikhathi bezibona bethandwa ngabalandeli, laba basale ngemuva kulokho okubalulekile nabebekuqashelwe.

• FUNDA NALA | Iqiniso ngokushoda kukaMokoena kwiBafana – Dlangalala

Izolo bebegcona abanye, namuhla yibo asebebhekene nekusasa elingaqinisekisiwe futhi sebephendule izisulu zabalandeli.

Ibhola alinamngani. Lingakuphakamisela phezulu namuhla, kusasa likushiye ubheke phansi.

Uma ungangikholwa, buza u-Sipho Mbule noGeorge Matlou. Bazokutshela ngalokhu. 

• EZISHISAYO| Cofa lapha usithole kuWhatsApp